Store planar for mai: – Litt realistar, og veldig optimistar
– På det meste blir det hundre personar på scena samtidig, seier kulturskulerektor Anne Cathrine Eiken
Dei siste par åra har kulturskulen gjort stor suksess med juleframsyningar i idrettshallen i Norheimsund. I fjor stod «Ei julefortjeling», som selde 1.325 billettar, på programmet.
Men i år blir det inga juleframsyning. Til gjengjeld har kulturskulen store planar for våren. Då skal han setja opp framsyningar av «Ronja Røvardotter» på ei utescene på Sjusete.
Arrangørane frå kulturskulen har tatt turen opp til skianlegget for å planlegga.
– Det er eit stykke som eignar seg godt til å gjera ute. Her kan me bruka omgivnadene rundt sjølve scena òg, seier kulturskulerektor Anne Cathrine Eiken og ser rundt seg.
Mellomaldermarknad
Det er ikkje mangel på ambisjonar. Det skal vere live-musikk i framsyninga, deriblant med vaksenkora Fryd og Gaman, og dessutan vaksne skodespelarar i tillegg til kulturskuleelevane.
– På det meste blir det hundre personar på scena samtidig, seier Eiken.
Kulturskuleelevane har for lengst byrja på øvingane til framsyninga, fortel lærar Regine Matre Nordheim.
– Dei har begynt å gleda seg allereie.
I tillegg planlegg dei å setta opp ein mellomaldermarknad utanfor sceneområdet, med musikk, mat og aktivitetar.
Mykje skal gjerast før mai, altså.
«The show must go on»
Det er ikkje tvil om at uteframsyninga krev meir av arrangørane.
Scena må byggast, området treng litt rydding, og ikkje minst må kostyma lagast. Blant anna.
– Me er heldigvis i gang allereie. Om ikkje, hadde eg begynt å få litt panikk, trur eg, seier kulturskulelærar Arngunn Timenes Bell og ler.
Dyrare blir det også. Heldigvis har kulturskulen pengar i banken, ifølgje rektor. I tillegg satsar han på at kvemmingane løyser billett, slik dei har gjort til juleframsyningane.
Det blir totalt tre framsyningar, med plass til mellom 360 og 400 på kvar framsyning.
I heradet sitt budsjett for 2025 er det sett av 150.000 kroner til framsyningane. Arrangørane legg til grunn at det blir ein heil del dugnadsarbeid.
– Me er litt realistar, og veldig optimistar. Samtidig som me er løysingsorienterte, samanfattar Bell.
– Er det risikabelt med uteframsyning på Vestlandet? Kva om det regnar?
Gruppa tygg litt på spørsmålet, før Bell svarar:
– Då må me jo berre stå i det. Skodespelarane kan ikkje dekka til kostyma med regnklede, seier ho og legg til:
– «The show must go on».
