Storband bidreg til landslovfest
Hardanger Big Band spelar ei av dei kulturelle rollene når landslovjubileet vert feira i Gulatingsparken komande helg.
Storbandet skal, i samarbeid med sjølvaste Jens Wendelboe, «skapa evig ekko i fjella rundt Gulatinget», ifylgje marknadsføringa frå Gulatinget. Konserten er del av ei feiring som startar fredag og varar til og med sundag.
Storbandet, som har øvingsbase på Jonsvoll i Jondal, hadde i helga seminar med Wendelboe for å førebu seg. Han er orkesterleiar, komponist og trombonist, kjend frå mellom anna ei rekkje NRK-produksjonar. HBB har samarbeidd med han før, til dømes då han komponerte tingingsverket til 35-årsjubileet til storbandet i 2022.
Nettopp dette verket skal spelast i Gulen fredag kveld, i tillegg til ymse andre verk frå hans hand. Wendelboe skal leia konserten og storbandet saman med Arild B. Nielsen, som er fast musikalsk leiar i HBB.
Saksofonist og forretningsførar Angunn Handegard Trå i Hardanger Big Band fortel at oppdraget i Gulen faktisk ikkje vart tildelt før i juni, ettersom planen opphavleg var at Wendelboe skulle framføra noko saman med lokale heltar. Då det gjekk i vasken og ideen om HBB kom på banen, måtte medlemene i storbandet hiva seg rundt og øva meir enn vanleg i sommarferien. Dessutan måtte haustsesongen starta litt tidlegare enn vanleg.
Musikarane har øvd kvar for seg og i mindre grupper, og hadde éi felles øving før seminarhelga, fortel Trå.
– Etter helga kjenner me oss klare for ei flott konsertoppleving på ein plass med historisk sus, seier Trå, som fortel at bandet er lova ei scene med tak over hovudet på det ho reknar med er ein vêrutsett stad.
Trå fortel at bandet tek med seg fiolinist Helge Stokke og vokalist og kulturskulerektor Anne Cathrine Eiken frå Kvam til Gulen. Wendelboe var nemleg orkesterleiar for Donna Summer. Eiken skal framføra Summer-hiten «Hot Stuff» i parken.
– Det er til å få både ståpels og tårer i augekroken av, lovar Trå.
Arrangementet i Gulatingsparken i Gulen er ei av ei lang rekkje markeringar av 750-årsjubileet til landslova til Magnus Lagabøte. Mellom anna debattar, føredrag, framsyningar og utstillingar står på programmet.
