Stedje-suksess i Strandebarm
Det var ingenting å seia på oppmøtet då Olav Stedje heldt konsert i Hallvardsnaustet i Strandebarm laurdag. Éin konsert vart til tre.
Kvar einaste stol var oppteken då HF var innom på den siste konserten klokka 21. Publikum sat nærast som sild i tønne i den tidlegare båtverkstaden, utan at det såg ut til å gå ut over humøret.
– Eit fantastisk oppmøte, sa arrangør Helge Raknes i Barmen AS då han ynskte velkomen.
Raskt utselt
Barmen AS, som driv og eig Hallvardsnaustet, eig han saman med sonen, Espen Nordset Raknes.
Billettane til kveldskonserten vart utselde på ein time. Då spurde Raknes om det var mogleg for Stedje å spela ein konsert også på dagtid. Det takka sogningen ja til. Til saman vart det selt mellom 130 og 140 billettar, ifylgje arrangøren. Også restauranten hadde fullt hus før konsertane.
Då Raknes fortalde publikum at Stedje også hadde teke seg tid til å spela nokre songar på Strandebarm omsorg mellom konsertane, stod jubelen nærast i taket.
Det var Strandebarm omsorg som tok initiativ og spurde, seier Stedje til HF før konserten. Han takka ja til nok ein ekstrakonsert, og det vart ei fin stund i atriet, synest han.
– Du turnerer litt framleis?
– Eg er vorten ein vaksen mann etter kvart, så det er ikkje like mykje som før. Men eg spelar no litt, seier Stedje.
Gamal favoritt
Dei største slagerane kom på slutten. Publikum fekk også litt historie rundt songane. På dagtid møtte eit meir vakse publikum, medan publikumet på kvelden var noko yngre, fortel Raknes.
– Kvifor Olav Stedje?
– Han er ein av mine gamle favorittar. Eg og frua har alltid hatt veldig sans for han. Eg tenkte at «fakerten, eg kan jo prøva», seier Raknes.
Det lukkast han med med det same. Og med slik suksess er det gjerne verdt å høyra med andre store namn òg, legg arrangøren til.
