Språkekspert kjem til Kvam
Korleis går det eigentleg med norsken?
Mellom anna det spørsmålet freistar professor Sylfest Lomheim svara på når han vitjar Fossehuset i Strandebarm 27. september. Språkendring vert eit nøkkelord i føredraget.
– Ved hjelp av nyord som er komne inn i det norske språket, tek han oss med på ei språkreise gjennom dei siste hundre åra. «Perfekt storm» og «dødsing» er døme på slike nyord, skriv arrangør Kvam Mållag i ei pressemelding.
Lomheim er professor i norsk og omsetjing, kjend frå tida som direktør i Språkrådet og mykje nytta som ekspert og kommentator på språkfeltet i pressa.
Han vitjar Kvam dagen etter den europeiske språkdagen, som vert markert lokalt med føredraget. Dagen har vore markert sidan 2001.
Mållaget har med seg Fosse-Stiftinga og Folkeakademiet i Kvam på arrangørlaget.
