Spela og song for full hals: — Kjekt med liv i huset
Torsdag kunne ein gjeng unge musikarar og songarar i Jondal endeleg invitera familie og sambygdingar til ein noko seinka jolekonsert.
Det som skulle ha vore ein konsert før jol, enda opp med å verta ein vårkonsert for elevane ved Ullensvang kulturskule.
Frå jol til vår
Trass fleire utsetjingar på grunn av pandemi og sjukdom har ikkje dei unge musikarane late seg stoppa. Ein etter ein, og nokre i par og grupper, entra dei scena på Jonsvoll. Dei framførte verk i ulike sjangrar på mellom anna piano, saksofon, toradar og gitar.
Frøy Hagen Petersen er avdelingsleiar i kulturskulen i Ullensvang. Han tykkjer det er veldig kjekt å vera i gang med konsertar igjen. Før dei unge songarane og musikarane heldt konsert i Jondal, hadde dei ifylgje Petersen halde ein vellukka konsert i Kinsarvik.
— Det er moro å visa fram det ein held på med og å kunna dela musikken med andre, seier han.
Sjå bilete frå konserten her:
Etterlengta konsert
Anne Karin Stormyr, som har ansvaret for mellom anna barnekoret Solstråla, opplyste at kring nitti personar var til stades. Det å få fylt opp forsamlingshuset i Jondal med publikum har vore etterlengta.
— Dette er veldig kjekt. Me vil jo ha liv i huset, seier Stormyr.
Medan nokre av elevane framførte kjende og kjære barnesongar, fekk andre syna fram jolelåtar dei i lengre tid har øvt på. Banda i gruppa framførte fleire slagerar frå utlandet. Framføringa av Johnny B Good av Chcuk Burry vekte liv i fleire rockeføter. Enkelte slo til og med til med litt hoftevrikking.
Von om normale tider
Dei siste to åra har ifylgje Petersen vore prega av mykje digital undervisning, i tillegg til sjukdomsperiodar blant både elevar og lærarar. No vonar han at dei får halda fram som normalt, og han fortel at gjengen har fleire framføringar i vente dei komande vekene.
Kulturskulen i Ullensvang har kring 280 elevar. 60 av dei høyrer til avdelinga i Jondal. Undervisningstilbodet til skulen består av musikk, teaterproduksjon og visuell kunst.
