«Speaker park»: – Ei unik lyttaroppleving

Dei siste dagane har kuratorane Leo Preston og Veronica Robles Thorseth vist utstillinga til skuleelevar i Kvam. Utstillinga er open for alle båe dagar i helga.

«Speaker Park» er ei utstilling kunsthuset har jobba lenge med, og håpet er at ho skal halda i fleire år.

– Det er ikkje ofte ein artist får laga musikk for 24 høgtalarar, fortel Preston.

Ein slags park

På grunn av dei mange lydspora er utstillinga den einaste måten denne musikken kan lyttast til på. Kunstnarane fekk fridom til å blanda forskjellige materiale samen med nye, gamle og resirkulerte høgtalarar.

– Utstillinga skal opplevast som ein slags park, seier Preston.

Høgtalarane i utstillinga blir nesten eit eige instrument. Ein skal kunna gå rundt i rommet og ha ei flott lytteoppleving, samtidig som den visuelle kunsten skal kalla på merksemda di.

Kuratorane interesserer seg for bruk av rom og infrastruktur, og meiner det er spennande å prøva å tilpassa og ta omsyn til alle faktorane. Høgtalarane er tilpassa for å fylla rommet og gje besøkjande ei unik oppleving.

– Dette rommet er kjempespanande å jobba med. Sjølv om det er stort, følte vi at me greidde å fylla heile rommet, seier Thorseth.

Kan flyttast

Ynsket er å gje fleire komponistar sjansen til å visa sine verk. Difor kan utstillinga enkelt flyttast, av di ein har nytta lett tilgjengelege materiale som er tilgjengelege i andre land, slik at ein kan gjenskapa installasjonen. Montering og demontering av installasjonane er ein krevjande prosess.

Thorseth og Preston er også leiarar for Kunsthuset Wrap i Bergen, som er eit artistdrive senter for kunstnarisk produksjon og kommunikasjon. Wrap Bergen er skildra som «et alternativt sted med laidback stemning». Ingen av fasilitetane er eksklusiv for nokon spesiell artist. Det tyder at ein sjølv kan leia produksjonsrom og visa fram eigen kunst. Dette gir moglegheit for nye og fleire artistar.