Sparkar i gang leselyst

– Me håpar jo på at me skal finne gleda i å lesa, seier biblioteksjef Ragna Helene Soldal i Kvam.

Fredag 31. mai vert det sleppt ein kickoffvideo på sommarles.no. Med i videoen er Victor Sotberg, Odin Helgheim og ei dramatisering av kapittel 1 i historia som du kan finna i lesekampanjen. Allereie neste dag kan deltakarane logga seg inn eller laga nye kontoar. Deretter kan deltakarane registrera alle bøkene dei les eller får lese opp for å tena «XP» – ei form for lesepoeng – og deretter nå eit høgare nivå («level», red. merknad). Sommarles er laga for å oppfordra borna som har brukt heile året til å lesa, slik at dei ikkje skal verta sette tilbake i løpet av sommaren. Det er viktig at særleg dei yngre borna les for å knekkja lesekoden, fortel Soldal.

Allereie har biblioteket begynt å gjera klart til Sommarles. Dei har begynt å pynta i vindauga og hengt opp sommarlesbanner. Dei har fått fleire spørsmål frå born og foreldre om når dei begynner, når dei kan registrera seg og når dei kan logga seg inn. Biblioteksjefen har begynt å sortera og setja fram bøker som borna har vist interesse for før. Om sommaren får dei sendt inn bøker frå bibliotekfilialane i Ålvik og Strandebarm, som er stengde om sommaren, fortel Soldal.

Sommarles tilbyr kvart år ei historie skriven av Mari Moen Holsve. Historia handlar om Astrid og Asbjørn. Karakterane har standpunkt i norrøn mytologi med ein moderne vri. I år hamnar dei i gamingverda. Kapitla til historia vert gradvis opna i løpet av sommaren, og borna kan svara på spørsmål om kvart kapittel i tillegg til å reisa til biblioteka for å få kodeord som gjev ekstra poeng.

Tidlegare år har rett under halvparten av alle skuleelevar delteke. Soldal håpar å nå 50 prosent i år, og gler seg til oppstart. Ho seier at borna er klare til å setja i gang, og at ein rekord hadde vore kjekt.

På biblioteket opplever dei at borna, spesielt dei yngre, har ei positiv innstilling til Sommarles. Fleire unge kjem inn på biblioteket og seier dei har lært seg å lesa på grunn av Sommarles. Biblioteksjefen seier at både foreldre og born kan forventa å verta tekne imot og få hjelp.