Snart kan du låna bøker på eiga hand i Jondal og Ålvik

I Ullensvang kommune sin temaplan for kultur for perioden 2023–2027 står det at meirope bibliotek i Jondal skulle ha vore på plass i 2023. Verksemdleiar for bibliotek og kultur i Ullensvang kommune, Else Marie Sandal, seier at biblioteket skal verta meir tilgjengeleg i år.

– I ein plan kan ein setja eit tidspunkt ein ynskjer seg, men ofte tek ting lenger tid. Det skal på plass, og må i alle fall koma på plass i løpet av året, seier ho.

Sandal fortel at biblioteka i Ullensvang er inne i ein prosess der alle systema skal bytast ut. Det systemet som vert nytta i dag, skal fasast ut. Difor arbeider kommunen med å henta inn tilbod. Ifylgje Sandal vil truleg ikkje boklånarane merka noko til endringa. Kanskje kan biblioteket verta meir brukarvenleg ved at dei kan bruka ein app, seier ho.

I samband med denne prosessen vonar ho at løysinga for at folk kan låsa seg inn med lånekort og pinkode, kjem på plass.

– Må finna pengar

Sjølv om løysinga er ny for kommunen, er det teknologi som allereie finst og er i bruk andre stadar, seier Sandal. Det skal difor ikkje vera for komplisert å få til. Verksemdleiaren forklarer at teknologien ikkje er på plass, på grunn av personalutfordringar. Ho seier at ein av dei tilsette har vore lenge vekke i permisjon, og at det difor ikkje har vore kapasitet til å setja i gang prosjektet. Det er dessutan eit økonomisk spørsmål.

– Sidan det står i temaplanen, må me finna pengar til det. Det er litt utfordrande fordi det å byta til nytt system òg er eit stort økonomisk løft, seier Sandal.

Det ligg godt til rette for at jondalsbiblioteket kan verta meir tilgjengeleg, ifylgje Sandal. Sidan det ligg i fleirbrukshallen, er det jamn trafikk i bygget og området også etter skuletid, seier ho.

Det er ikkje avklart når på dagen biblioteket skal vera tilgjengeleg. Tysværtunet kulturhus i Aksdal har kino, bibliotek og symjehall. Der kan folk låsa seg inn på biblioteket så lenge dei andre tilboda er opne, fortel Sandal. Medan opningstidene for Tysvær bibliotek er 10–18, er det sjølvbetent klokka 8–21.45.

– Må fylgja opp

Før alt er klart i Jondal, må kommunen avklara kva aldersgrensa for å nytta tilbodet skal vera, og det må koma på plass eit overvakingssystem, seier Sandal.

Ho fortel at Ullensvang bibliotek skal tilsetja ein person til. Vedkomande skal ha oppgåver ved biblioteket i Jondal og ved dei andre avdelingane, ifylgje Sandal.

– Me har ein veldig flink tilsett i Jondal, men me kunne ha trunge fleire og meir ressursar der. Det handlar gjerne om systemkompetanse og å klara å utvikla løysingar.

– Eg kryssar fingrane og håpar at me på slutten av året kan konkludera med at me har fått det på plass. Folk er opptekne av det, så då må me fylgja opp, seier Sandal.

– Anna løysing

Sidan 2022 har det vore snakka om at biblioteket i Ålvik skal verta meirope. På vegner av Kvam herad, og etter initiativ frå Ålvik Grendautval, søkte biblioteksjef Ragna Helene Soldal då om 140.000 kroner frå Vestland fylkeskommune. Ifylgje Soldal må meirope bibliotek på plass i år om ein skal få nytta pengane.

– Det vert meirope, men med ei litt anna løysing enn me søkte om, seier Soldal.

Ho påpeikar at Kvam herad har teke i bruk «Aktiv kommune», ei digital teneste for leige og utlån av lokale og utstyr frå kommunen. Ved hjelp av systemet kan innbyggjarar med tilgang låsa seg inn i kommunale bygg.

Ifylgje Soldal er utlånsautomaten allereie på plass på biblioteket i Ålvik. I løpet av året må sluttrapporten til fylkeskommunen leverast, for å få pengane, seier Soldal. Då skal det vera mogleg å nytta bibliotekrommet utan at det er betent, seier biblioteksjefen.

– Me har ikkje diskutert når biblioteket skal vera ope. Eg ser føre meg at det kan vera frå til dømes klokka 9 til 20 eller 21. Det er berre å programmera inn i systemet, så vert det slik me bestemmer oss for, seier Soldal.

Tekniske løysingar er klare

Dei tekniske løysingane er allereie på plass, ifylgje Stein Rykkje, leiar for forvalting, drift og vedlikehald av bygg i Kvam herad. Han fortel at det er bestemt å nytta eksisterande hovudinngang, i staden for sidedøra ein hadde tenkt å bruka. Døra var ein naudutgang, og det vart for komplisert å få det til, seier Rykkje.

Heradet treng difor ikkje kjøpa ny dør. Men rimelegare vert det ikkje. Hovudinngangen må ferdigstillast. Dreneringa skal utbetrast, og inngangen skal få universell tilkomst. Rykkje fortel at dette ikkje vart gjort ferdig då kafeen vart etablert.

– Dette er den beste løysinga. Me sparte kostnadane med døra, men fekk andre kostnadar i staden. Det er innanfor same budsjettet, seier Rykkje.

– Enklast for brukarane

Det er ikkje sett ein dato for når biblioteket skal verta meir tilgjengeleg. Det er heller ikkje bestemt om folk skal nytta lånekort og pinkode for å koma seg inn, eller om dei skal bruka systemet «Aktiv kommune».

– Å nytta «Aktiv kommune» krev ein smarttelefon. Me må vera trygge på at me ikkje ekskluderer nokon frå å bruka tilbodet, så kanskje alternativet er å nytta ein kombinasjon av båe løysingane. Me må landa på det som er enklast for brukarane, seier Rykke.

Ifylgje Rykkje er det ikkje mange som har etterspurt lengre opningstider.

– Å ha meirope bibliotek hjelper ikkje på det sosiale. Om du skal gå der når det ikkje er betent, møter du heller ikkje på andre, seier Rykkje.