Skodespel og latter på «Epos»
Litteraturbåten «Epos» inviterte jondalselevar til framsyning torsdag føremiddag.
Framsyninga «Ylva og villgeitene» er skriven av forfattar Hilde Myklebust, og vart framført til elevar frå 1. til 4. klasse.
Med stemma si og eit rikt kroppsspråk fekk skodespelar Lina Taule Fjørtoft borna til å le fleire gonger. Dagleg leiar Maria Pile Svåsand kallar stykket for «ei forteljande framsyning».
«Epos» til USA
Historia handlar om jenta Ylva og faren hennar, som skal på tur til eit sommarhus som ligg på toppen av eit fjell. Stien opp dit er veldig smal og bratt, og villgeita Svartskjegg og flokken hans byr òg på problem. Musikken i framsyninga er skriven av Annlaug Børsheim frå Ulvik.
Den om lag seksti år gamle båten har også fått merksemd frå New York Times. Journalist James Hill frå den amerikanske avisa har jobba verda rundt, men er på sin fyrste tur til Noreg. Hill har vore med båten i ein vekes tid, og skal skrive ein reportasje om båten for eit bokmagasin.
Godt besøkt
Båten, som har vore på turné sidan slutten av april, kom frå Ulvik denne dagen. Ifylgje den daglege leiaren har båten vore godt besøkt.
– På turen så langt har me hatt over 900 vaksne og born som har besøkt båten. Det er veldig kjekt, seier Svåsand.
– Nokre stader har me fått spørsmål om å ha fleire framsyningar, slik at fleire klassar får sjå, fortel ho.
Turneen held fram til 18. juni.
