Skiltet er på plass att
«Draumen-skiltet» som vart fyrst øydelagt og dinest stole i Herand, er erstatta.
Det opplyser Harding Puls i ei pressemelding. 2. påskedag vart det sett opp eit nytt gult skilt med teksten «draumen» langs Mælsvegen, etter at den fyrste versjonen fyrst vart utsett for hærverk våren 2021 og så vart stolen i fjor sommar.
Kunstnaren bak verket «Veiviser», som var del av kunstprosjektet og -løypa «Mellom himmel og fjord. SJÅ!» i 2014, er Siri Kollandsrud. Ho henta inspirasjon mellom anna frå farens død og frå diktet «Det er den draumen» av Olav H. Hauge.
Det nye skiltet har fått tittelen «Erstatning for stjålet drøm», og skal minna oss på at draumane er viktige også når det ser svart ut.
– Verket er ope for tolking. Og sjølv om det ikkje var min intensjon, har eg ei kjensle av at nokre lokale nærast har teke skiltet til seg som eit stadnamn. Eg gler meg over at det vart godt motteke, og håpar at det nye skiltet kan skapa undring og setja i sving nye tankar, skriv Kollandsrud i pressemeldinga.
