Skal vera arkeolog i Roma

Selsvold har fått stilling som postdoktor ved Det norske institutt i Roma. Instituttet er eit forskingssenter under Universitetet i Oslo. Selsvold skal arbeida der dei neste fire åra. Ho kjem til å driva med både forsking og undervisning.

– Det vert rart og spanande å byrja i ny jobb, fortel Selsvold.

Ho forskar på religion, gravskikkar og samfunnsendringar i slutten av den romerske perioden.

Underjordisk interesse

– Alt som er under jorda, er kjempespanande! Katakombane er det mest interessante i Roma, tykkjer Selsvold.

Dei underjordiske gravene breier seg over fleire mil under byen. Selsvold gler seg til å bu så nær det ho forskar på. Ifølgje henne kan ein læra mykje av å studera graver. Korleis samfunnet var organisert, kva ein tenkte om etterlivet og forskjellen på fattig og rik.

Selsvold har vore i Roma mange gongar. Ho kjenner både byen og arkeologmiljøet. Gode vener av henne arbeider på institutta til Sverige, Finland og USA.

– Det vert triveleg å samarbeida med dei, seier Selsvold.

Arkeologmiljøet er ikkje så stort. På utgravingsprosjekt treffer ein fagfolk frå heile verda. Ifølgje Selsvold kjenner dei fleste arkeologar til kvarandre.

– Arkeologkonferansar vert nesten som ei gjenforeining på folkehøgskule, fortel ho.

Draumefunn

Noko av grunnen til at Selsvold er arkeolog, er spaninga ho kjenner under utgraving.

– Ein veit aldri kva ein finn. Plutseleg dukkar det opp noko fint eller viktig. Då vert det hurra-stemning, fortel 39-åringen.

Utgravingar inneber meir enn å kosta jord vekk frå små steinar. Gravemaskiner, hakker og spadar er ofte i bruk. Ifølgje Selsvold er murskei det viktigaste verktøyet til arkeologen. Fyrst når ein finn noko skjørt, må kosten fram.

Selsvold har delteke på fleire ulike utgravingar. Ho fortel at mange arkeologar har ei «bucket list» med ting dei ynskjer å finna.

– På mi liste har alltid tempel stått øvst. Det kan eg kryssa av no, seier ho.

Tempelet det er snakk om, ligg i den etruskiske byen Vulci, nord for Roma. Etruskarane er ei av folkegruppene som budde i Italia før romarane kom og tok over, rundt 300 år før Kristus. Utgravinga i Vulci er eit pågåande prosjekt, og Selsvold kjem til å jobba der om sommaren dei neste åra.

Vidfaren kvemming

Dei siste ti åra har Selsvold hatt base i Göteborg. Resten av familien held til i Noreg, men 39-åringen har vorte vand med å bu i utlandet.

– Eg er familien sin utanrikskorrespondent, seier ho.

Det ikkje flust med faste jobbar for arkeologar. Difor må ein ofte ta det ein får, og busetja seg der jobben er. Selsvold har budd både i Sverige, England, Tyrkia og USA.

– Ein må alltid begynna litt på nytt når ein flyttar, fortel Selsvold.

Heldigvis kjenner ho Roma godt, og veit litt kva ho går til. Selsvold vitja storbyen for fyrste gong som student i 2008. No skal ho undervisa norske studentar som tek same emne som Selsvold gjorde.

– Sirkelen vert slutta, seier 39-åringen.

Ho skal ta studentane med for å sjå ulike historiske stadar: Pantheon, Colosseum, katakombane og Pompeii. Selsvold gler seg til å kunna kommunisera og undervisa på norsk. Til no har det meste av arbeidet hennar gått føre seg på engelsk.

Roma på godt og vondt

Selsvold fortel at det vert eit privilegium å bu i Roma, omringa av så mykje historie.

– Roma er ein fantastisk by! Ein får eit inntrykk av kor monumental staden må ha vore i antikken, seier ho.

Kvemmingen er glad i å utforska dei tronge gatene som fører til fine torg, fontener og gamle kyrkjer. Men ho fortel at storbyen har sine ulemper. Så mange folk på ein stad kan fort verta kaotisk.

– Å ta seg rundt i byen er ofte ein kamp – særleg når ein skal rekka noko, seier Selsvold.

Bustadmarknaden er heller ikkje så enkel. Dei siste åra har det vorte meir populært for huseigarar å driva Airbnb i staden for langtidsleige. Selsvold skal bu på instituttet dei fyrste vekene medan ho jaktar på leilegheit. Ho tykkjer det er fint å oppleva andre land utan å vera turist.

– Ein får eit betre innblikk i kulturen når ein bur der over lengre tid, seier arkeologen.