Skal plutseleg på amerikaturné

I mai i fjor la artisten Boy Pablo ein heimelaga musikkvideo på Youtube. No vender bandet nasen vestover.

– Det vert veldig, veldig kjekt og utruleg spanande, seier kvemming Sigmund Vestrheim (19).

Han speler trommer i bandet til artisten Nicolas Rivera Pablo Muñoz, også kjend som Boy Pablo. Mellom 6. juli og 1. august skal bandet ha 22 konsertar i USA og Canada.

Vestrheim fortel at bandet har flest lyttarar i Amerika. I sosiale medium kjem det både meldingar og kommentarar frå ivrige tilhengarar som vil at bandet skal spela i nettopp deira heimby. Dei tilbyr omvisingar og anbefaler gode restaurantar.

– Det kjekke med sosiale medium er moglegheita til å komma i kontakt med folk. Det er like givande for oss som for dei.

Stor suksess på Youtube

Bandet, som møttest på Kongshaug musikkgymnas i Os, fekk mykje merksemd etter at musikarane laga ein musikkvideo på kaien ved skulen i mai i fjor.

– Me laga ein enkel film med eit par ulike vinklar og la videoen ut på Youtube. I byrjinga var det ikkje så mykje som skjedde, men etter kvart vart videoen sett meir og meir. Me fekk 100.000 visingar, så 300.000. Plutseleg hadde me over éin million visingar. Me tenkte «shit, kva skjer?»

I dag har musikkvideoen til låten Everytime vorte vist over 7,6 millionar gonger. Dessutan har dei fem mest spelte songane til bandet over 13,6 millionar avspelingar på Spotify.

– Kulaste eg har opplevd

Tidlegare i år la Boy Pablo ut på europaturné i regi av eit belgisk bookingselskap. Bandet spelte 15 konsertar og var innom mellom anna København, Berlin, Amsterdam, London, Paris og Valencia.

Det var første gong Boy Pablo har spelt konsert utanfor Noreg. Det var nesten utselt på alle konsertane, seier Vestrheim.

– Me var heilt i sjokk; det var mange i publikum, og folk brydde seg og song med. Det var til og med nokon som kom til hotellet vårt og ville ta bilete med oss. Det er det merkelegaste som har skjedd. Å reisa i lag med bestekameratar og gjera det kjekkaste du veit, er utruleg kjekt. Det tek på å vera på turné, og det vert lite søvn, men det er kanskje det kulaste eg har opplevd, seier Vestrheim.

Han seier det er sprøtt kor enkel vegen har vore frå å vera ein kameratgjeng som spelte i lag, til at dei no skal på turné i Nord-Amerika.

– Alle som speler eit instrument, drøymer jo om å få lov til å reisa og spela mykje. Då eg var liten, tenkte eg at det å verta stor rockestjerne, det skjer aldri av seg sjølv. Men no har det berre skjedd av seg sjølv, og me får moglegheita servert på eit sølvfat. Det er heilt vilt. Alle er veldig takksame, overraska og gira, seier han.

Vil leva av trommene

Mest av alt gler Vestrheim seg til å spela i Los Angeles. Der vart dei rundt 300 billettane til konserten selde på under to døgn, og bandet måtte legga inn ein ekstrakonsert dagen etter med plass til endå fleire.

– Det er sosiale medium som har gjort alt dette. Me hadde heilt sjukt flaks på Youtube, og har vore veldig aktive på Instagram, der me når flest, seier han.

Vestrheim var russ i fjor. No bur han i Oslo og studerer utøvande rytmisk musikk med trommer som hovudinstrument. Dei andre i bandet bur i Bergen og Os.

Han fortel at han fekk det første trommesettet då han var fem år. Sidan ungdomsskulen har han spela «på ordentleg».

– Boy Pablo tek mest tid, men eg har litt andre spelejobbar. Planen er å leva av musikken.