Sjenerte naboar hamna i rampelyset

Saman med Vegard Markhus vann Sangolt prisen i barnemusikklassen for plata Rockesock, som var den aller fyrste som vart delt ut. Som om ikkje det var nok, sikra trommis Sigmund Vestrheim seg prisen i nykomarklassen saman resten av Boy Pablo-bandet.Elevar ved Norheimsund skule spela ei viktig rolle i innspelinga av både Rockesock og ein tilhøyrande musikkvideo. Det er såleis inga overdriving å seia at også alle desse har kvar sin vesle bit av prisen. Dei fekk, saman med familie og musikarar, fortent heider og ære i takketalane på Chateau Neuf i Oslo.- Skulen skal få låna statuetten og ha han der ei veke eller to. Dei har vore så positive og gira og har sagt ja til alt av våre sprell, seier Sangolt takksamt.

Terapi og musikk

Han seier at duoen frå Norheimsund sjølvsagt hadde eit håp om å vinna, men hadde i mente at det var sterke konkurrentar: Mandarinsaft, Tonje Unstad og Karoline Krüger og Fru Nitters rytmeorkester.- Me våga ikkje å håpa for sterkt. Det var veldig stas då namnet vart ropa opp. Eg mista kjensla i kroppen ein augneblink. Det var ei ut-av-seg-sjølv-oppleving, seier Sangolt.- Kva tyder ein slik pris for dykk?- Veldig mykje for meg personleg, og heilt sikkert for Vegard òg. Me byrja tidleg å finna på ting i lag, men var veldig beskjedne og hadde eit mål om å våga å syngja for andre før me var 40, som me sa i takketalen. Det klara me. Då me byrja med dette prosjektet, fekk eg ikkje vera i same rom som Vegard når han skulle syngja, så det har vore eit terapiprosjekt for oss. Og så er det stas å få til dette i lag med min beste ven.- Kjem det fleire plater?- Me har lyst til å gjera meir, og kan ikkje gje oss no. Me har nokre vage planar, seier multiinstrumentalisten.

Trivst i bakgrunnen

Så atterhaldne er karane at dei like godt styrte unna den raude løparen, med pressekonferansen i samband med nominasjonen fersk i minnet. Pressa har nemleg ein tendens til å flokka seg kring nokre få store stjerner og oversjå andre, som barnemusikarar. Duoen orka rett og slett ikkje ei slik oppleving til.- Det er slik det er. Me forventar ikkje stor merksemd, seier vinnaren.Heller ikkje då prisen var sikra, kjende dei sterk trong for å stikka seg fram. Dei vifta ikkje nett med vinnarprovet, for å seia det slik, då dei var på etterfest på Grand Hotel saman med mange andre større og mindre stjerner.- Me fekk kjeft av konene våre for måten me bar statuetten på. Dei meinte at me var for beskjedne, seier Sangolt.Statuetten kom heilskinna gjennom kontrollen på flyplassen og finst no i stova på Norheim.- Eg må vel byggja meg ein peis.