Sjarmen med larmen
Hadde du leilegheit på Hardanger Brygge i helga, så var det éin ting som gjekk att i utsikta: grøne bøttehattar.
Bøttehattane og andre grøne, bondske effektar er nokre av kjenneteikna til Bygdalarm. Festivalen som får store delar av Kvam til å stå på hovudet. Det klarte den i år òg. Mange møtte opp på «meieritomta» i Norheimsund for å få med seg den 15. utgåva. Fredag vart det selt 1.275 billettar og laurdag 1.670 billettar.
Astrid Sandven og Pia Skeie vart båe 18 år nyleg. Det var såleis fyrste gong dei deltok på Bygdalarm.
– Det kjekkaste er stemninga, seier Sandven.
Medan Sandven hadde sikra seg eit helgepass, hadde Skeie vore med som frivillig tidlegare i veka. Det sikra henne gratis inngang til konsertane. Kakkmaddafakka, Ingebjørg Bratland og Fagernes Yacht Klubb var artistane som veninnene såg mest fram til å sjå opptre på scena. Etter konsertane skulle dei to på klubb.
– Det er viktig å få heile opplevinga, seier Skeie.
Sjå Fagernes Yacht Club skapa liv her:
Veteranar vende tilbake
Fagernes Yacht Klubb spela i år på Bygdalarm for tredje gong. Fyrste gong dei stod på scena var i 2011. Då heldt festivalen til i Øystese.
– Det er fyrste gong me er her i Norheimsund å spela på Bygdalarm, seier Irem Muftuoglu.
Ho er ein av vokalistane i bandet. Dei skryter av Norheimsund og seier det er mellom dei flottaste plassane dei får opptre på.
– Me som står på scena, har jo den vakraste utsikta, seier Håkon Njøten.
Dei fortel at dei ikkje takkar ja til kva som helst festival. Også gjestfridomen rosar dei. For heile bandet er det viktig at den er god.
– Dei to stadene me gledde oss mest til i år, var Norheimsund og Lofoten, seier Njøten.
Folk er nøgde
Etter at festivalområdet var tømt og folk hadde gått inn i sentrum for å halda fram festinga, samanfatta festivalsjef Ida Sørheim det heile: Festivalen var ein suksess.
– Heldige med vêret var me òg, sa ho.
15-årsjubileet vart feira med både kranlyft av traktor og flammar i fôrhaustarar. Ifylgje Sørheim var det faktisk ein del som ikkje fekk med seg den gnistrande traktoren som fauk over scena.
– Eg sa til dei at dei får sjå etter på bilete og videoar.
Og bilete frå festivalen finn du her:
