Sette tonen for jula
Hardanger Big Band jazza opp julestemninga med både musikk og dekor i tre ulike lokale i helga. Endåtil ein verdspremiere stod på programmet.
Startskotet gjekk i Jondal kyrkje fredag kveld. Laurdag fekk Haga kyrkje i Samnanger vitjing, før miniturneen vart avrunda med konsert i Kunsthuset Kabuso i Øystese sundag.
Flest tilhøyrarar kom i sistnemnde lokale, der godt og vel seksti stilte opp. I Haga var det tynt i rekkjene, medan frammøtet i Jondal vart ein mellomting.
– Me er ikkje skuffa over det, men trudde kanskje det hadde kome litt fleire. Men det er mykje som skjer og mykje å konkurrera med, og det får me ikkje gjort noko med, seier saksofonist og forretningsførar Angunn Handegard Trå.
Ingen tvil
Fleire av musikarane hadde fjelga seg med «julete» hovudpynt. I tillegg sytte farga lys, lyslenkjer og pyntenissar for allereie før ein tone var spela å fjerna det meste av tvil om kva høgtid me nærmar oss. Då musikken byrja, var all tvil borte, for her kom klassikarar på rekkje og rad etter avsparket med «Jingle-Bell Rock». Bandet veksla mellom reine instrumentale innslag og akkompagnement til song av vokalist Anne Cathrine Eiken og dirigent Arild B. Nielsen, anten kvar for seg eller i fellesskap.
Attåt dei medverka fiolinist Helge Stokke, som var med på å framføra «The Mysterious Island Theme», arrangert av Jens Wendelboe, for storband og fiolin, for aller fyrste gong. Midtvegs i konserten tilførte han publikummet endåtil litt meir vårlege vibrasjonar med «Vårsøg».
Tradisjonen tru vart julejazzen avrunda med «Amazing Grace», som frå ein stille start med vare saksofontonar bygde seg opp instrument for instrument til ei mektig avrunding der publikum vart med på allsong.
Storbandet skal ikkje ha fleire konsertar før jul, men Trå forsikrar om at dei fleste medlemene likevel er travelt opptekne. Dei er nemleg med i ymse andre kor og musikklag. To – Anne Karin Stormyr og Gro Belsnes Eide – er dessutan organistar.
Nokre er sakna
Ho røper at bandet ikkje byrja øva i lag til julekonsertane før denne månaden, ettersom mykje tid i haust gjekk med til plateinnspeling. Dirigent Nielsen forventar likevel at alle øver separat og stiller godt budde.
– Om ikkje, seier han det på ein fin måte. Han er ein god pedagog, skryter Trå.
Ifylgje Trå er besetninga temmeleg stabil. Den største utfordringa er å rekruttera trombonistar og saksofonistar, noko som er naturleg i ein region der brassbanda dominerer.
– Me er alltid opne for nye som har lyst til å prøva seg og vera med, seier ho.
Kva bandet eventuelt skal finna på til våren, vil ho ikkje ut med enno. Det som er visst, er at det vert ei ny utgåve av Fjordatonar i Jondal i september og at den fyrste helga i januar er øvingshelg med nytt stoff.
– Me kan ikkje røpa alt, seier Trå.
Sjå fleire bilete frå konserten her:
