Set i gang arbeid med nytt publikumsbygg
Åsane Byggmesterforretning AS skal leggja til rette det nye publikumsbygget ved Hardanger fartøyvernsenter.
Arbeidet med Kulturnaustet startar truleg i oktober, etter årevis med arbeid med planlegging og finansiering. Vona er at det er klart til bruk våren 2025, opplyser Hardanger og Voss museum i ei pressemelding.
Avgjerda om å starta er teken før bygget er fullfinansiert. Takka vere nylege tilskot frå både staten og fylkeskommunen på til saman 12 millionar kroner har museet likevel nok pengar til å setja i gang. Løysinga er bygging i fleire etappar, parallelt med at det vert arbeidd med å skaffa pengane som manglar.
Putlar med pengar
Museumsdirektør Åsmund Kristiansen gler seg til å setja i gang, noko som er mogeleg som fylgje av god lokal støtte til prosjektet. Han stipulerer at for å realisera heile prosjektet som ynskt, manglar kring 20 millionar kroner.
– Sidan me kan gjera det etappevis, startar me sjølv om ikkje alt er i boks. Me håpar me får dei siste midlane på plass, seier han til HF.
Museet arbeider jamt og trutt med å få tak i pengar. Planen er i alle fall å senda ein søknad til Kvam herad om ytterlegare stønad, truleg på kring åtte millionar kroner. Elles dreg alle moner, og bidrag er hjarteleg velkomne, fortel direktøren. Siste utveg er å finansiera det som eventuelt måtte mangla, med eit banklån.
– Me er ein organisasjon som er basert på offentlege tilskot, sjølv om me har store eigeninntekter. Me har ikkje like stor låneevne som ei bedrift som har eit overskot kvart år, seier direktøren.
Helst full pakke
Prosjektet er delt i tre etappar og opsjonar. Det som enklast kan sløyfast og i alle fall utsetjast, er fjelging og tilrettelegging av uteområdet. Eit alternativ som i større grad vil medføra eit funksjonelt tap, er å venta med ein del fast inventar i bygget, til dømes benker, bokhyller, plassar i kinosalen og skranke.
Men alt heng saman, påpeikar Kristiansen, som gjerne skulle hatt eit fint både ute- og inneområde for å få folk til å kjenna seg mest mogele velkomne. Draumen hans er såleis å få realisert alt med det same.
Bygget er ei av brikkene i generalplanen og utviklingsprosjektet «Tett på». Det omfattar mellom anna verkstader, kurslokale, uteområde og maritimt museum.
I ei stortingsmelding om museum for nokre år sidan vart fartøyvernsenteret omtala som det viktigaste kompetansesenteret i landet for å vidareføra kunnskap om og dugleik i å byggja nye og å setja i stand historiske båtar og fartøy av tre.
