– Set av pengar i 2026!
Fosse-Stiftinga var raskt ute med å varsla staten om tomtevalet til fylkeskommunen.
Kvam herad har enno ikkje teke stilling til forprosjektet om Fosse-senteret eller til loksalisering av senteret.
Men få dagar etter at fylkesutvalet 26. november stilte seg bak valet av den tidlegare skuletomta på Tangerås, vende Fosse-Stiftinga seg til staten for å informera om avgjerda til fylkespolitikarane, som vert skildra som eit «endeleg vedtak».
– Med dette er ein no i gang med neste fase, som er eit eittårig hovudprosjekt for å avklara innhald og driftsmodell, skriv stiftingsstyret i brevet som styremedlem Sverre Sørnes formidla til Kultur- og likestillingsdepartementet 29. november.
Stiftinga reknar ikkje med å ha nok detaljinformasjon til å kunna søkja om stønad til satsinga i 2026 innan fristen. Ho ber likevel departementet om å ha senteret i tankane og allereie no setja av om lag 120 millionar kroner til senteret.
– Ut frå den skrøpelege økonomien til heradet og fylkeskommunen kunne Fosse-Stiftinga tenkja seg ei «julegåve» på rundt to millionar til vidare framdrift. Alle som no er med i Fosse-Stiftinga, er ubetalte, og ei julegåve vil vera ein honnør til det frivillige arbeidet stiftinga gjer og letta det økonomiske presset på stiftinga, skriv styremedlemene.
