Serverte julekos på kinoen
Laurdag 14. desember vart det vist julefilm i kinosalen i Norheimsund.
I førjulstida prøvde den kommunale kinoen i Ungdomshallen å laga litt ekstra stemning ved å visa julefilm med halv pris for alle, og å dela ut peparkaker i døra. Det fortel Stian Rykkje Jordalen ved Kvam kino.
Kinoen valde å visa den nye filmen «Jul med Astrid Lindgren» med billettar på billegsal. Filmen vart ein storsuksess, med nesten full sal. Jordalen seier kinoen har prøvd å visa filmar som passar til årstida, og ser at det fungerer.
Annonse
Nokon av dei som var på kino og kom smilande ut døra etterpå, var Emely Bjotveit Eknes, Liva Eknes Heien og Johanna Eknes Tveiten. Dei var i lag med bestemor Ingegjerd Pedersen Lid. Dei var veldig nøgde med filmen, og syntest at han var koseleg. Faktisk var det Johanna sin aller fyrste film på kinoen.
