Selde saker og ting
Det kan bli ukrainske julegåver under juletrea i Kvam i år.
På husflidsmessa i Øystesehallen hadde ei gruppe ukrainske flyktningar rigga seg til på eit bord. Der kunne messegjestene kjøpa både heimelaga ukrainske sjokoladepølser, kjeks, måleri, hekla kosebamsar og anna.
Katerina Melnik, som var ei av dei som stod på standen, fortel at nokre av inntektene frå salet går til dei som har laga varene. Resten skal brukast til velgjerande føremål i Ukraina.
– Me gjer dette både for å hjelpa Ukraina, men også fordi det er kjekt å delta på lokale aktivitetar her i Noreg, seier ho.
Ho fortel at ein har liknande messer i Ukraina. Sjølv har ho ikkje selt produkt på messer før, men ho har vore kunde på mange messer i heimlandet.
– Var spente på interessa
Som så mange andre arrangement måtte husflidsmessa ta koronapause. Førre messe var i 2019. Mykje tyder på at messa har vore sakna. Arrangør Øystese Kvinne- og Familielag kunne fortelja om ein travel dag. 774 vaksne personar betalte for å sleppa inn. Det er fleire enn dei 620 som gjorde det same i 2019.
– Me var veldig spente på korleis det kom til å gå. Var folk klare til å gå på husflidsmesse att, eller var slike messer på veg ut? Dei eg har snakka med, seier det er veldig kjekt at messa er oppe og går igjen, fortel messestyreleiar Sigvor Øystese Flotve.
Talet på utstillarar hadde gått litt ned. I 2019 var det 53, i år 43. Ifølgje Flotve hadde nedgangen nokre fordeler.
– Det gjorde at det vart betre plass rundt borda og betre plass til kafeen. Når det vert for fullt, slit gjestene med å få oversikt over alt. Tilbakemeldingane eg har fått, tyder på at gjestene likte dette, fortel Flotve.
Ho kunne elles fortelja om mange gjengangarar.
– Dei aller fleste utstillarane har vore her tidlegare. Det mest uvanlege var vel gjengen frå Ukraina, seier ho.
– Viktig for laget
Flotve fortel at husflidsmessa er den klart viktigaste inntektskjelda til Øystese kvinne- og familielag. Alle dei 56 medlemene bidrog til arrangementet.
– Mellom anna er det meste av bakverket som blir selt i kafeen, laga på dugnad av medlemene. Og alle medlemene har sine økter i hallen i løpet av messa, seier ho.
På eitt område trur ho dei kan forbetrast til neste år.
– Fleire har kommentert at me har vore for dårlege til å promotera oss i sosiale medium. Skal me nå fram til fleire unge, må me truleg verta flinkare til det, seier ho.
