Rauk ut på målstreken
Vegard Eide Aase, Heine Laupsa Haaland og Elise Løken representerte 10. klasse i Strandebarm i fylkesfinalen i «Klassequizen» torsdag.
«Klassequizen» er eit NRK-program som vert sendt på radio. Strandebarm skule har delteke før. Skulen endåtil vann landsfinalen i 2019.
I oktober fekk Strandebarm skule besøk av «Klassequizen», og opptaket av kviss-spørsmåla vart gjennomført på skulen. Eide Aase, Laupsa Haaland og Løken fekk 11 av 12 moglege poeng, og kvalifiserte seg for fylkesfinalen.
Kvass tevling
Torsdag reiste 10. klasse ved Strandebarm skule til Bergen for å få omvising i NRK-lokala og vera publikum. Kontaktlærar for 10. klasse, Vårin Ekeland, og miljørettleiar ved Strandebarm skule, Kamilla Heggøy Tombre, var med som reisefylgje.
Strandebarm skule tevla mot Nore Neset ungdomsskule i Bjørnafjorden, og bergensskulane Rå skole og Holen skole, om dei to finaleplassane i Hordaland. Fylkesfinalen vart send direkte på NRK Hordaland.
Før fylkesfinalen byrja, fekk Elise Løken spørsmål om korleis det var å vera med i fylkesfinalen.
– Me hadde ikkje trudd at me skulle koma så langt, seier Løken til NRK.
Rauk ut
Deltakarane fekk 3 spørsmål i kvar av 4 kategoriar. Maksimal poengsum var 12 poeng. Deltakarane fekk 30 sekund tenkjetid per kategori.
Fyrste kategori var sport. Her fekk Strandebarm skule 2 av 3 moglege poeng. Spørsmåla i andre kategori var om kropp og helse. Strandebarm fekk berre 1 poeng. I tredje kategori, kultur og musikk, fekk kvemmingane full pott. Dermed låg dei på delt 2.-plass før siste runde, som var i allmennfag. Her vart det berre 1 av 3 poeng.
Det var ikkje nok. Dermed rauk strandbermingane ut av tevlinga med 7 av 12 poeng. Rå skole og Holen skole gjekk vidare til landsfinalen i Oslo.
– Kjekk oppleving
Ordførar Torgeir Næss sende ei helsing til NRK der han ynskte Strandebarm skule og dei andre laga lukke til med tevlinga.
Kontaktlærar Vårin Ekeland vart intervjua av NRK halvvegs i fylkesfinalen. Ho skrytte av elevane sine.
– Dei er flinke. Litt bom og nokre treff, sa Ekeland.
Deltakar Vegard Eide Aase, bror til 2019-vinnar Sander, fortel at det det var ei kjekk oppleving, sjølv om laget rauk ut.
– Det byrja ganske slakt, og så klarte me ikkje å henta oss inn att.
Elise Løken er samd med Aase. Ho trur dei kunne hatt betre sjansar dersom dei hadde fått spørsmål i andre kategoriar. Ho hadde håpa på spørsmål innan historie og naturfag, fortel ho.
Ho oppmodar alle 10.-klassingar til å vera med dersom sjansen byr seg.
– Eg anbefaler alle å prøva dette. Det var kjekt, seier Løken.
