Raude grandtanter og andre cocktailar: — Dette har me ikkje tenkt på

Dette var nokre av kombinasjonane domarpanelet fekk sjå, lukta og smaka på då amatørane tok plass bak bardisken på Hardangerfjord Hotel i Øystese fredag kveld.

Trass få deltakarar vart det arrangert siderdrinkkonkurranse på hotellet, og det var ikkje noko å seia på innsatsen til bartenderane. Ein etter ein rigga dei seg til bak disken og kutta, målte og miksa så godt dei makta.

Sander Eide Aase og Eusebiu Amanalachioai stilte med heile fire ulike drinkar som dei blanda både på vegner av seg sjølve, og nokre vener som hadde meldt fråfall då kvelden kom. Drinkane var hurtigtesta kvelden før, opplyste Amanalachioai.

På førehand var kameratane spente på korleis det ville gå. Ifylgje Aase var drykken heime blanda med «trauste og helst dårlege» produkt.

— Eg raska saman det eg hadde i barskapet. Det var fjordsider på dunk og noko finsk bringebærlikør, så det vert jo ikkje det same som dei raffinerte råvarene hotellet byr på, seier Aase.

Den fyrste drinken, Knallsider, hadde dei mest tru på. Ifylgje Aase er tida i bygdeungdomslaget opphavet til namnet.

— Når me er samla og føler me har kontroll på det me skal, seier me alltid «den er knall». Difor vart det Knallsider, fortel han.

Dei to venene stilte også med Hardingrus(s), til ære for russen, Grandtante raud, som fekk namnet av den raude fargen og Appetittvekkjande, som var ein Aperol Spritz med sider i staden for prosecco.

Kameratane konkluderte med at dei bør vera tidlegare ute med førebuingane neste år, dersom det vert nye moglegheiter.

Rabarbrasaft og hibiskussirup

Restaurantsjefen på hotellet, Malene Rogdaberg Trå, stilte med sitt bidrag til barmenyen. Ho gjekk for smaksblandinga sider og rabarbra. Drinken hadde ho testa ut i sommar då ho laga råsaft av rabarbra og blanda henne med bringebærsider. Under tevlinga måtte Trå improvisera litt.

— Eg har ikkje den same rabarbraråsafta i kveld som i sommar, så då måtte eg tilsetja litt lime for å fremja smaken, fortel ho.

Joakim Lundström var den einaste deltakaren «utanfrå». Han vitja Øystese i samband med siderfestivalen og eit besøk til ein kjenning frå bygda.

Lundström hadde fått med seg konkurransen i festivalprogrammet for nokre månader sidan og møtte førebudd til tevlinga. I førevegen hadde han testa siderdrykken saman med sambuaren.

Drinken, som bar namnet Aldeles Sørfjord, bestod av drinkmikslikøren Glitterfisk med smak av hylleblom og lime, ein heimelaga hibiskussirup og lokal sider. Etter å ha levert drinken til domarane, slo han i hel ventetida ved å snakka litt med lokalavisa.

— Målet med drinken var at den raude fargen i botnen skulle få han til å sjå ut som eit eple. Eg tykkjer resultatet vart bra, men me får venta og høyra kva domarane seier, seier Lundström.

— Jaktar på det vesle ekstra

Hovuddomarane for kvelden var sidersommelier Thomas Digervold og direktør for mat og drikke i Hardangerfjord Hotels AS, Christer Økland. Dei tykte at deltakarane hadde fine idear og gode tankar om smakane. Digervold var nøgd etter å ha vurdert dei ulike blandingane.

— Det har vore ei kjempekul oppleving. Medan me sat der, tenkte eg «oi, dette smaka godt saman» og «oi, dette har me ikkje tenkt på», fortel han.

Vinnardrykken skilde seg klart ut, ifylgje domarane. Dei kunne sjå ein tydeleg samanheng mellom utsjånad, lukt og smak, og var ikkje i tvil om kva for ein drink som pirra smakslaukane mest. Økland danna seg tidleg eit inntrykk av kven som var godt førebudd og kven som kunne ha førebudd seg betre. Begge domarane tykkjer det er kjekt at det no er fleire som eksperimenterer med sider heime.

— Me jaktar alltid på dei drinkane med det vesle ekstra. Det er veldig viktig i ulike typar cocktailar, seier sidersommelieren.

Drinken som fall i smak hjå flest, og som blir å finna på barmenyen på hotellet ut året, var Lundström sin Aldeles Sørfjord. Og vinnaren var aldeles nøgd med det.

— Kva skal ein seia? Dette var «hur gøy som helst!» seier han.