Rakk å øva litt før 17. mai

Dei største musikklaga i Kvam rakk nokre få øvingar før nasjonaldagen, men musikantane stiller opp likevel.

Førre måndag kom Norheimsund Musikklag omsider i gang med øvingar att etter nær to månader i koronadvale.

– Ein del syntest det var dumt å mista måndagsøvingane. Dei sakna det sosiale og musikken, seier lagsleiar Ragnar Hansen.

Laget har bytt øvingsstad frå amfiet på skulen til idrettshallen, der det er monaleg betre plass til å stetta smittevernkrava til avstand mellom musikantane.

I Øystese har musikklaget fått tre fellesøvingar, etter at gjengen fekk eksklusiv tilgang til idrettshallen litt tidlegare av Kvam herad, fortel leiar Gjermund Stuve. Der øver også dei med forskriftsmessige avstandar mellom seg, forsikrar han. Den fyrste veka kunne laget endåtil nytta heile hallen.

Også i Ålvik er laget så vidt i gang att etter den ufrivillige pausen. Lillian Aga fortel på vegner av laget at fyrste øving var måndag. Laget har speleoppdrag både ved Folkets Hus og aldersbustadene 17. mai, men utan marsjering i år.

Deler ingenting

Ragnar Hansen, som er lege, har sjølv teke på seg rolla som smittevernansvarleg i Norheimsund. Han ser til dømes til at ingen deler utstyr og klutar, og at desinfiserande middel er på plass. Pausar og kaffikos må ein droppa.

Kor mykje medlemene har øvd kvar for seg i «koronatida», veit han ikkje, for laget har ikkje kravd rapport. Musikarane har ikkje nytta digitale plattformer til å spela «saman» frå kvar si stove. Han ottast likevel ikkje for kvaliteten.

– Me har relativt lang erfaring med 17. mai, så det held med eit par øvingar med gjennomgang av seks–sju marsjar, seier Hansen.

Sjølv om det er opna for det, vel laget å ikkje marsjera i år på grunn av risikoen for å koma for nær einannan. Laget skal spela i samband med salutten både om morgonen og den «nasjonale» salutten klokka 13, i tillegg til ei økt i Grova i samband med kortesjar både på land og sjø (sjå side 6).

Den tradisjonelle 17. mai-frukosten på Thon Hotel Sandven vert det derimot ikkje noko av dette året.

Har halde seg i aktivitet

– Me håpar det skal verta god lyd i oss til 17. mai, seier Gjermund Stuve.

Laget har fleire speleoppdrag både her og der på nasjonaldagen, og hadde endåtil tenkt å marsjera litt om vêret vert nokolunde godt. Det ser i skrivande stund ut til å verta nokolunde dårleg.

I motsetnad til i nabobygda har medlemene hatt ein del fellesøvingar via nettet, sjølv om ikkje alle har vore med på dei. Med bakgrunnsmusikk i øyretelefonane var det litt uvant å sitja og spela i einsemd i starten, men det gjekk seg til og var ikkje så verst, fortel leiaren.

Laget har elles hatt fleire mindre grupper i aksjon rundt om i bygda i koronatida, og enkelte har endåtil slege seg laus heime på terrassen og i kyrkjetårnet.

Både i Øystese og Norheimsund har skulemusikken fått øva før dei vaksne, med etterfølgjande grundig vask av stolane, og mange av dei unge vil vera med på 17. mai. Båe laga hadde planlagt turar som er avlyste på grunn av koronatiltaka.

Økonomisk utsette

Musikklaga lid økonomisk på grunn av koronatiltaka, fortel leiarane. Hansen opplyser at laget er påført relativt store tap, ikkje minst fordi sjauarinnsatsen for Hardingtonar går i vasken. Dessutan vart ein vårkonsert avlyst. Sistnemnde er kompensert av regjeringa. Laget prøver å få inn nokre kroner med ein spleiseaksjon.

– Me har høg kontingent som det er, og må me auka han, kan det verta mindre attraktivt å spela med oss, seier Hansen.

Laget valde å vera solidarisk med og løna dirigent Patrik Randefalk sjølv om øvingane stoppa. Han dirigerer også andre lag og har ymse andre oppdrag som er avlyste.

Musikklaget i Øystese har relativt god likviditet og har ikkje kome så verst frå det, men har tapa på avlysing av Korpslarm, som laget står for, og ein konsert i vår. Også dette laget har fått kompensasjon frå regjeringa. Det håpar på meir og har søkt Sparebankstiftinga Hardanger om stønad, opplyser Stuve.

– Det er ikkje heilt håplaust, men me har heile tida kostnader, seier leiaren.