Prata om bøker om edle dropar
Under årets Siderprat i sofaen vart to bøker for siderinteresserte presenterte.
Den eine heiter Siderboka – frå frukthagen til ferdig produkt på flaske og er skriven av siderekspert Eivind Vangdal. Den andre heiter Sidereventyret og er skriven av Camilla Aasen, Bernt Bucher-Johannessen og Eivind Haalien.
Både Vangdal, Aasen og Bucher-Johannessen var til stades under praten, som vart leia av siderekspertane Kasper Wrem Anderson og Thor Oddvar Havn.
Lærebok om siderproduksjon
Vangdal fortalde at boka hans handlar litt om siderhistoria og om kva sider er for noko, men at den først og fremst er ei bok om korleis ein lagar sider.
Boka vender seg både til dei som ønskjer å vera hobbyprodusentar og dei som vurderer å verta profesjonelle siderprodusentar.
– Boka har kapittel om eplesortane, om kva utstyr du treng, om gjær og om alt du må gjera for å produsera ulike sidertypar, sa Vangdal.
Mot slutten av boka er det eit kapittel der forfattaren går gjennom regelverket profesjonelle siderprodusentar må hanskast med.
Fortel siderhistoria
Sidereventyret tek mellom anna for seg ulike siderprodusentar og går gjennom historia til fruktvinen.
Boka inneheld portrett av fleire av pionerane som byrja med norsk kommersiell siderproduksjon mot slutten av 1990-talet, og som var med på å bana veg for den bølgja med nye produsentar som har kome dei siste åra.
Bucher-Johannessen fortel at han fekk ideen til boka for fem år sidan.
– Den norske fruktvinen har ei mykje lengre historie enn mange er klar over. Eg tykkjer det finst for lite litteratur om dette. Det er årsaka til at eg tok initiativ til boka, sa han.
