Populær påskeløype
Det er ikkje berre skiløyper som er tingen når ein skal ut og lufta seg i påsken. Kring 150 deltakarar stilte opp på aktivitetsløypa Påskespretten i Tørvikbygd skjærtorsdag.
Amanda Økland Nernes bur i Dalheim-nabolaget og har vore med på Påskespretten fleire gongar.
– Det har vorte ein tradisjon, fortel ho.
Nernes tykkjer det er artig at det kjem så mange. Ho kjenner att fleire av deltakarane frå åra før.
– Opplegget er kjempekjekt! Eg går for siger i dag, seier ho.
Randi Økland er med på å organisera Påskespretten i år. Hendinga har vore eit fast innslag i påskeferien sidan 2015. Dette er Økland sitt andre år som arrangør. Aktivitetsløypa består av 20 postar. Turen går frå Dalheim til Stekka og tilbake. Ein får brynt seg på både rebusoppgåver, spørsmål, tippekonkurranse, puslespel og skyting med luftgevær.
– Runden passar for folk i alle aldrar, seier Økland.
Etter at løypa er gjennomført, er det moglegheit for grilling. I tillegg kan ein kjøpa kaker og brus i ein provisorisk kiosk. Påskespretten starta som ein liten nabolagsaktivitet for ni år sidan. No har ordet spreidd seg, og i år deltek over førti lag. Både lokale, hyttefolk og tilreisande.
– Det er rekordmange med i år! Det er kjekt, seier Økland.
