Politikarar vil trø inn bremsen for Fosse-senter

Kvar skal det framtidige Jon Fosse-senteret liggja?

Spørsmålet har skapt sterkt engasjement dei siste månadane.

Både Fosse-Stiftinga og fylkeskommunen har peika ut tomta med dei forlatne skulebygga på Tangerås i Strandebarm som ei passande plassering. I november vedtok eit samrøystes fylkesutval å gå vidare med tomta.

Fosse-Stiftinga opplyser i brev til Kvam herad at ho har ein avtale med Trond Mohn, ein av grunneigarane i området: Så snart heradet stiller seg bak det fylkeskommunale vedtaket om å gå vidare med tomta på Tangerås, vil Mohn kjøpa dei andre eigarane ut og overføra området gratis til stiftinga.

Men fyrst må altså Kvam herad bestemma seg. Rådmann Anita Hesthamar er av fleire grunnar meir usikker enn fylkesutvalet, noko HF tidlegare har omtala. Kort fortalt dreier det seg om uvisse knytt til eigedommen og potensielle kostnader med riving eller restaurering av dei gamle skulebygga.

Hesthamar har utarbeidd eit forslag der ho kort fortalt tilrår betre kartlegging av tomta på Tangerås, og dessutan å senda forprosjektet på høyring før ein går vidare i arbeidet. Dessutan vil ho, for å sikra ryddige prosessar, halda Fosse-Stiftinga borte frå vidare utgreiing av eigedommen.

Truleg for utgreiing

Saka vert drøfta av formannskapet fredag. Alt tyder på at eit fleirtal vil støtta rådmann Anita Hesthamar sitt forslag om å dra i bremsen.

Gruppeleiarane i Ap, Frp og KrF – partia som saman med V utgjer fleirtalskoalisjonen i Kvam – seier til HF at dei er positive til rådmannen sitt forslag, men understrekar også at dei vil sjå an debatten i møtet før dei røystar.

– Me må gjera eit vedtak som står seg i framtida, skriv gruppeleiar i Ap, Linda Haugland Jondahl, i ein sms til HF.

– Kritiske røyster vil hevda at utsetjing vil få konsekvensar for framdrift og engasjement, og kanskje setja heile prosjektet i fare?

– Som eg skreiv, så støttar me forslaget. Resten tek me i formannskapet.

Sp, gjennom gruppeleiar Gjermund Stuve, seier til HF at partiet ikkje støttar forslaget. Han opplyser at Sp vil koma med eit alternativt framlegg. Det går ut på å støtta vedtaket i fylkesutvalet om å velja skuletomta som lokalisering utan vidare utgreiing, og å ynskja eit eitt år langt hovudprosjekt der fylkeskommunen, heradet og stiftinga får roret.

I tillegg har Bjarte Helland i eit lesarinnlegg i HF argumentert for å velja skuletomta no for å sikra framdrift.

H har gruppemøte torsdag, og har dermed ikkje teke stilling til saka enno, opplyser gruppeleiar Arne Sandven. Anne Marie Øvrevik (V), Geir Madsen (SV), Håvard Gjerde (R), Odd Valland Bovim (MDG) er i utgangspunktet positive til framlegget frå rådmannen, med visse atterhald om eventuelle endringar og det som måtte koma fram i ordskiftet.

Uansett ser det så langt ut til å vera politisk fleirtal for ein versjon av framlegget frå rådmannen når saka vert avgjord av heradsstyret 7. februar.

Vil ha framdrift

Fosse-Stiftinga byrjar på si side å bli utolmodig. I ein e-post til heradsstyret i Kvam for nokre dagar sidan kjem stiftinga med fleire kommentarar til rådmannen sitt forslag. Mellom anna vert fylgjande påpeika.

• Rasfaren og det biologisk mangfaldet i området allereie er kartlagt.

• Området er allereie ferdig regulert.

• Fosse-Stiftinga ser i motsetning til rådmannen ikkje trong for fleire høyringar. Ho hevdar at forprosjektet allereie har vore på høyring.

I tillegg opplyser styret at Sverre Øyvind Sørnes, som sit i styret i stiftinga, skal ha selt seg ut av dei aktuelle eigedomane på Tangerås. Det at Sørnes «sat på begge sider» i saka, kunne nemleg oppfattast som uryddig, skriv rådmann Hesthamar i sakspapira.

Rådmannen understrekar elles at det er gode argument for å velja skuletomta på Tangerås, men at fleire moment må avklarast før ein går vidare. Ho tilrår i mellomtida ikkje å greia ut andre tomtealternativ.

Inviterte makthavarane

HF har denne veka freista få tak i styreleiar og kontaktperson i Fosse-Stiftinga, Åse Ljones, men ho hadde torsdag ikkje svara på førespurnader via telefon, sms og e-post.

Tysdag fekk dei politikarane som ynskte det, høve til å sjå på og verta orienterte om tomta på Tangerås av Fosse-Stiftinga. Invitasjonen, som opphavleg kom av politiske initiativ i førre veke, vart formidla til heradsstyret via ordføraren. Frammøtet var frivillig. Dimed vart ikkje møtet definert som eit møte i eit folkevalt organ, med dei krav som fylgjer om mellom anna formell innkalling og tilgang for ålmenta. Pressa vart ikkje invitert til å delta.

Gry Merethe Kyrkjeeide (Frp) var ei av fire i Frp som deltok på synfaringa. I alt deltok 13 folkevalde frå åtte parti, opplyser ho. Gjestene var ifylgje henne fyrst på synfaring, og dei fekk sidan tilbod om å vera med til Strandebarm Sportell.