Planlegg minneutstilling med multikunstnar

I den samanheng ynskjer Tom-Arne Steine, einebarn etter livskunstnaren, å skipa til ei minneutstilling, skriv han i ei pressemelding.

Håkon Steine var fødd og oppvaksen i Odda. Sine siste år budde han i Norheimsund. Han laga minst 250 hardingfeler. Dotter til Tom-Arne har ei fele som er nummerert 223.

Produktiv kunstnar

Steine produserte kunst heilt fram til han døydde, 85 år gamal, i 2008. Steine gjorde svært mykje treskjerararbeid, og mange av verka finst i Hardanger. Steine var ein levemann, og levde frå bilete til bilete, seier sonen. Etter han hadde selt eitt, drakk han opp pengane, meir eller mindre.

Tom-Arne Steine vonar at folk som eig verk etter faren, vil ta kontakt og vera villige til å låna dei ut til utstillinga eit par veker i september neste år.

Kvar utstillinga vil finna stad, avheng av kvar dei fleirtalet av verk vert leverte frå – anten Norheimsund eller Odda.

Fekk son i Nord-Noreg

Tom-Arne Steine er fødd og oppvaksen i Svolvær i Lofoten, der mora hans kjem frå. Ho hadde eit kort sambuarskap med Håkon i sine unge dagar. Fylkesmannen undersøkte om det var fleire born etter faren i samband med dødsattesten, og det var det ikkje, seier sonen.

Han vitja Steine då han budde på Kaldestad, og faren var ein del på besøk i Svolvær. Steine hadde eit alkoholproblem heile livet, og det gjorde at han vart nekta tilgang til heimen i Svolvær av svigermora. Det var litt turbulent kring han, ifylgje sonen, men far og son var jamleg i kontakt per brev og telefon.

– Eg visste om han heile tida, og hadde ein viss kontakt med han, men eg kjende han aldri som far, seier Tom-Arne.

Sjølv har han arbeidd med logistikk på eit skipsverft i Svolvær, og er i dag pensjonist. Han bur no i Sellebakk i Fredrikstad.

Etternamn frå Steinsdalen

I Norheimsund budde Håkon Steine fyrst på Kaldestad, så i eit kommunalt hus ved idrettsplassen. Han kunne sjå ned på grasbanen frå arbeidsrommet, fortel sonen.

Steine-namnet kjem frå Stor-Ola-garden i Steinsdalen, opplyser Tom-Arne Steine.