På biltur frå Storbritannia

Paret kjem frå Storbritannia og hadde lagt tre lange reisedagar bak seg då bladfyken trefte dei på Hereiane rasteplass mellom Herand og Jondal. Langham fortel at dei vurderte å fly og deretter leiga bil, men at dei likte tanken på ein «road trip» gjennom Europa. Paret har med seg dottera på snart to år, som tilsynelatande trivst i baksetet. Ifølgje Langham har ho sove store delar av turen.

– Me plar tulla, leika og syngja med ho når ho er vaken, seier faren.

Han har vore i Noreg fleire gongar før. I 20-åra var til dømes engelskmannen på Svalbard for å gjera vitskaplege undersøkingar av isbrear. Han har òg stått mykje på ski i dei norske fjella og padla kajakk i elver og fjordar. Både han og Adkin er glade i friluftsliv, men dei fortel at det ikkje er like lett når dei har med seg ei lita jente på tur.

Les også:

«A cup of tea»

Familien kom til Jondal kvelden før og overnatta i telt i nærleiken av Folgefonna.

– Det var relativt kaldt og regnfullt. Litt av ein velkomst, ler Langham.

Paret hadde reist frå ei heitebølgje som herja England for nokre veker sidan. Etter gårsdagens stusslege fem plussgrader var dei nøgde då dei vakna til sol og opplett. Langham meiner at vêret er perfekt – sol, men ikkje for varmt. Paret likar spontanitet når dei er på tur. Dei planlegg som regel ikkje neste stopp før dei er undervegs.

– Fridomen kjennest godt. Men det kan slå feil av og til. Viss ting går gale, gjeld det å ha ei positiv innstilling, fortel Langham.

Han siktar til at ein plutseleg kan stå utan hotellrom eller teltplass når det nærmar seg leggjetid. Familien planlegg å overnatta mest i telt i løpet av noregsferien. Langham fortel at trioen legg seg inn på hotell om vêret er veldig vått og elendig.

– Slik får me oppleva det beste frå båe. Telting gjev oss fleksibilitet, og så kan me nyta eit komfortabelt hotellrom når me har behov for det, seier engelskmannen.

Familien har med seg stormkjøken til matlaging. Det fungerer godt også til å koka vatn. Midt i samtalen med bladfyken snur engelskmannen seg til kjærasten og ropar «have you made tea, darling?». Tekanna var litt vanskeleg å finna i det fullpakka bagasjerommet, så det fekk venta til neste pause.

Lydlaus ferje

Planen for dagen var å køyra til Eidfjord og setja opp teltet der. Deretter set familien kursen mot Telemark, der dei skal i bryllaup til syskenbarnet til Adkin. Paret har fleire norske slektningar – inkludert brudgommen. Sjølve har engelskparet leika med tanken på å flytta til Noreg ein dag.

– Eg elskar dette landet! Det er veldig kjekt å koma på besøk med jamne mellomrom, fortel Langham.

Han er veldig glad i å køyra på norske vegar. Familien tek seg god tid, slik at dei får med seg utsikta. Ifølgje engelskmannen er det herleg å kunne stoppa når ein vil, i motsetning til på autobanen i Tyskland.

– Me kosar oss! Her er vakker natur og passeleg med trafikk, fortel Langham.

Les også:

Han er fascinert over alle tunnelane og at ferjene er elektriske. Då dei skulle ta ferja til Jondal dagen før, sat han og venta på at motorduren skulle setja i gang.

– Det skjedde aldri, så eg lurte på om ferja flytta på seg i det heile, seier Langham.

Han skulle ynskja at ferja frå Newcastle til Noreg framleis var i drift, for då hadde dei sloppe den store omvegen gjennom Europa. Familien skal vera i Noreg i ti dagar før han vender tilbake til heimlandet.