Øystese-natur er bakteppe for ny utstilling

Åse Løvgren, ein av kunstnarane, har nemleg laga tredimensjonale modellar av mose og lav i det freda vassdraget. Ifylgje ei pressemelding frå Kunsthuset Kabuso om utstillinga Fjordmelk Jordtåke får ho artane til å tre fram på uvant vis og få ein ny karakter. Det gjev ei utvida mogelegheit til å fortelja nye historier, opplyser Kabuso.

I det store og heile spelar fjorden og landskapet kring Øystese ei sentral rolle i utstillinga. Løvgren samarbeider med mellom andre Stine Gonsholt, som stiller ut verket Bakkeobservasjoner. Det er omarbeidde kart som syner dei hydrologiske tilhøva i landskapet kring Øystese. Kart viser til dømes væte i bakken og avrenning. Med décollage fjernar ho informasjon om vatnet og peikar såleis på mogelegheita for «fråvær og endringar i landskapet».

Dei to kunstnarane skal i tillegg syna fram videoinstallasjonen The Universal Machine.

I Skifte.Land finn ein Frøydis Lindén, Malin Lobell og Sidsel Bonde. Dei har invitert deltakarane på det flytande symposiet F (jorden) om bord på «Mathilde» i slutten av månaden. Desse skal visa verk som vert utvikla på symposiet, som strekkjer seg frå indre Hardanger til Bergen og rommar fleire seminar og arrangement. Mat, klima og berekraft er nøkkelord i verka, som vil verta supplerte midtvegs i utstillingsperioden.

Utstillinga i hovudsalen vert opna laurdag og står ut året. I tillegg opnar ein installasjon med ein lyttestasjon i foajeen. Denne vert ståande til 4. desember. Her vert podkasten Folk & Dyr, laga av kunstnarane Yngvild Færøy og Søssa Jørgensen, spela. Han er resultatet av ein rundtur i Solund med betydninga av dyr som nøkkelord. 23. oktober skal kunstnarane laga live radio i Kabuso.