Over Nordsjøen i Vikøy
30. juli inviterer toradarspelar Ingrid Standal Sørheim kvemmingane til kyrkjekonsert med trioen Vesterveg i Vikøy kyrkje.
Vikøy-kvinna er del av den norsk-britiske folkemusikktrioen. Vesterveg oppstod i 2018 då Sørheim var på utveksling i Newcastle upon Tyne i England. Der vart norsk slåttemusikk og keltisk fløytemusikk kombinerte til eit unikt repertoar. Trioen spelar ein miks av tradisjonelle slåttar frå Noreg og Storbritannia, pluss eigenkomponerte melodiar.
– Det er alltid spesielt å spela heime i Vikøy. Eg gler meg til å dela musikken med kvemmingane og ikkje minst til å visa korleis ein kul, liten springar frå Kvam høyrest ut på irsk sekkepipe. Det er spanande at hardingfelespelarar her frå fjorden også i tidlegare tider har hatt kontakt med musikarar på dei britiske øyene og utveksla musikk, seier Sørheim i ei pressmelding om konserten.
Tidlegare i sommar fekk ho 2.-plass i durspel seniorklassen på Landskappleiken. Ho står for levande musikk på Hardanger fartøyvernsenter i juli også dette året, og måndag, tysdag og onsdag vil Vesterveg vera gjesteartistar der og by på smakebitar frå kyrkjeprogrammet.
Trioen består av Robert «Bob» Downham frå Leeds i England på fløyter og sekkepipe, Lisa Haugeland frå Flekkefjord på fele og hardingfele, og Ingrid Standal Sørheim på durspel.
