Ord og tonar frå Steinsdalen og Etne
Organist og komponist Solveig Sørheim frå Etne held konsert i Dalatun onsdag 26. april.
Konserten «Besto syng» byggjer i hovudsak på barnesongar som Sørheim lærte av bestemora, Solveig Trå frå Neteland i Steinsdalen. Bestemora si oppvekstveninne, Ragna Byrkjeland, og Brita Lid, som syskenbarnet til Trå, har bidrege til repertoaret. Desse tre hugsa songane frå oppveksten. Sørheim vil dessutan spela religiøse folketonar frå Etne.
Sørheim spelar trøorgel på konserten. Ingemund Thorsheim Askeland syng og trakterer klarinett, munnspel, gitar og fiolin. Han spelar elles banjo i Bergen Mandolinband og i Lady Hardanger.
Steinar Aalvik, som har morsfolket sitt frå Haokogarden, er òg med på konserten. Mor til Aalvik var syster til Trå. Aalvik er skribent og forteljar på hobbybasis.
– Han er vel verd å koma for å høyra. Aalvik vil kåsera om dagleglivet i Hardanger og i Etne. Han er knakande god, seier Sørheim.
Sørheim er utdanna ved Griegakademiet i Bergen. Ho har i mange år vore organist i kyrkjene i Etne, og har gjeve ut boka «Di gamle songadne» om folk og musikktradisjonar i Etne.
Ho arbeider no som komponist med statleg kunstnarstipend og har permisjon frå organistjobben.
Trå var fødd i 1930, og voks opp på Haokogarden på Neteland. Ho gifta seg med Nils Trå frå Herand. Dei flytta til Etne og levde som gardfolk der. Dei fekk tre døtrer og seks barneborn.
