Opna kunstgalleri i Øystese

Galleriet opna dørene for gjester for fyrste gong laurdag 5. oktober. Kunstgalleriet ligg i Kyrkjebø, andsynes Øysteseparken og kyrkja. Håkon Evanger eig og skal driva galleriet. Han registrerte verksemda Evanger Rammeverkstad og Galleri i september.

Evanger var på jobb i Nordsjøen då galleriet opna, og gjekk difor glipp av opningsdagen. Han skal ha verkstaden og galleriet som ein hobby og bijobb i dei periodane han er heime. Ifylgje gallerieigaren ynskte dei lokale kunstnarane å opna under Siderfestivalen i Øystese. Evanger fortel at det vart lodda ut eit bilete laga av den lokale kunstnaren Guri Heggland-Haslerud til ein av gjestene som var innom.

– I stor grad er det trykk og litografi som vert utstilte i galleriet, og då vert prisane meir overkomelege. Her kan ein finna fine gebursdagsgåver, seier Evanger.

Arv etter onkel

I løpet av denne månaden eller neste månad skal Evanger opna rammeverkstad.

Evanger fortel at ein onkel, Alf Froestad, har drive trykkjeri, galleri og rammeverkstad i det same bygget i mange år. Froestad er blitt pensjonist og har flytta til Granvin, men han skal hjelpa til med galleriet.

– Han gav seg for mange år sidan. Me har heile tida snakka om at han skulle gje meg opplæring i å laga rammer og ramma inn. No fann me ut at tida var inne. Onkelen min har ein del kunst som han skal stilla ut for sal, seier Evanger.

– Kjekt med lys

Rammeverkstaden skal vera hovudgeskjeften, ifylgje eigaren. Lokalet er stort, så det er god plass til eit galleri òg, seier han.

– Det er kjekt at det er lys i forretningsvindauga når ein går forbi, seier Evanger.

Hovudsakleg ynskjer han å visa fram kunst frå lokale kunstnarar, som til dømes Kari Ekaas og Tord Torpe. Det vert òg stilt ut kunst frå meir kjende, opplyser Evanger. Han har fått tilsendt kunst frå Oddvar Torsheim, som ifylgje Evanger har mange kjende bilete.

Han vonar alle som ynskjer noko fint å hengja på veggen, tek turen innom. Målet er å få selt kunsten. Når galleriet skal halda ope, er ikkje klart endå. Men planen er at dørene skal vera opne for publikum to dagar i veka.