Geir Madsen opna «døra» til Kulturnaustet, slik at dei tilsette ved Hardanger fartøyvernsenter fekk koma inn i bygget for fyrste gong.

Opna døra til Kulturnaustet

Mange fekk sjå Kulturnaustet frå innsida for fyrste gong då Hardanger fartøyvernsenter inviterte til kranselag torsdag.

Journalist
Publisert Sist oppdatert

Bygget skal, i tillegg til å romma publikum, ha 30 arbeidsplassar med tilhøyrande garderobar og møterom, bibliotek, dokumentasjonssenter og kafé. Sjølv om pengane til bygginga ikkje er heilt på plass, er bygginga i full gang. Kranselaget torsdag markerte at taket er på plass.

Direktør Åsmund Kristiansen i Hardanger og Voss museum fortalde om bakgrunnen for namnevalet. Han sa at eit naust er ein stad der båten står med tak over. Kulturnaustet skal spegla litt av kulturane båtane representerer.

Prosjektleiar Geir Madsen (t.h) hadde plukka grønt i hagen før kranselaget. Anleggsleiar Rune Lyseknappen opna med å fortelja at dette er den største kransen han har sett.

Manglar seks millionar

For å finansiera heile prosjektet, manglar 20 millionar kroner. Kristiansen seier at inntil 14 millionar kroner kan finansierast ved hjelp av lån. Dei siste seks millionane må han skaffa for å verta heilt ferdig med bygget.

– Me har jobba mykje med det, men eg kan ikkje svara på kvar me skal finna pengane, seier Kristiansen.

Han håpar Kulturdepartementet vil bidra med meir pengar. Søknaden til departementet gjeld både Kulturnaustet og Handverkartunet. Handverkartunet skal verta ein båthall med lagerplass for delar og ting til båtane.

Lars J. Berge og Solveig Valland er arkitektane bak Kulturnaustet. Valland fortalde at ho teikna den fyrste versjonen i 1994. I oppgåva med å forma bygget sa ho at det var fokus på å veva historia saman med notida, og bygget saman med museet. Bygget skal vera ein møteplass for bygda.

Direktør Åsmund Kristiansen tala til både tilsette og samarbeidspartnarar under kranselaget. Gjennom vindauga i Kulturnaustet ser ein rett ut på den noverande kafeen.

Endra konstruksjonen

Førebels har arkitektane spart pengar ved å forenkla bygget. Konstruksjonen er endra slik at bygget er kortare, smalare og lågare enn opphavleg, fortel Berge. Om det ikkje kjem meir pengar på plass, må meir sparast. Prosjektleiar ved fartøyvernsenteret, Geir Madsen, seier at det då vert eitt mindre opparbeidd uteområde og leikeareal. Kanskje må han på jakt etter brukte møblar for å koma i mål.

Anleggsleiar Rune Lyseknappen i Åsane Byggmesterforretning AS fortel at bygginga så langt går etter planen. Bygget skal leverast i mai 2025. Om lag tretti personar er involverte i arbeidet, anten administrativt eller med å setja opp bygget.

– Dette er annleis enn dei prosjekta me vanlegvis har i Bergen. Det er fint tømrararbeid, og både framdrift og kvalitet er vareteke, seier Lyseknappen.

Om alt går etter planen, skal bygget ha offisiell opning 30. august neste år.

Sjå fleire bilete frå kranselaget her:

Anleggsleiar Rune Lyseknappen (med hjelm) og arkitektane Lars J. Berge (t.v.) og Solveig Valland var på plass til kranselag.
Direktør Åsmund Kristiansen (t.v.) seier kulturnaustet vert eit signalbygg. Geir Madsen leier prosjektet for Hardanger fartøyvernsenter.
Lars J. Berge er ein av arkitektane bak Kulturnaustet. Han fortalde om ei rekkje løysingar for at mellom anna ventilasjonsrøyr og straumleidningar skal verta skjulte.
Rune Lyseknappen feira kranselag med kake.
Rune Lyseknappen synest det er kjekt å sjå brukarane av bygget så tidleg i prosessen.
Frå Kulturnaustet kan ein nyta utsikta til Hardangerfjorden gjennom store vindauge.
Dei tilsette fekk koma inn i Kulturnaustet for fyrste gong torsdag. I andre etasje skal det byggjast om lag tretti kontorplassar i tillegg til møterom og garderobe for dei tilsette. Målet er at alle arbeidarane skal starta dagen her, før dei går kvar til sitt, seier Geir Madsen.
Arkitekt Lars J. Berge seier at dagslyset skal koma ovanfrå og ned, og så spreia seg inn i kontora og møteromma.
Personane på biletet står her i det som skal verta hovudinngangspartiet til Kulturnaustet. Der skal publikum koma rett inn i resepsjonen.

Bli med på omvising i Kulturnaustet:

norheimsund kultur kultur og underhaldning arkitektur hardanger fartøyvernsenter bibliotek og museum
Laga med Labrador CMS