– Open for Fosse-samarbeid
Om Fosse-senteret bør slåast saman med ein eksisterande kulturinstitusjon, kan Hardanger og Voss museum (HVM) vera eit høveleg alternativ.
Det skriv Åsmund Kristiansen, direktør i HVM, i eit innspel til prosessen med å etablera eit Fosse-senter. Kristiansen meiner at det kan liggja fleire synergieffektar i eit slikt samspel.
Kompetanse på litteratur er viktig, men det er også mykje annan kompetanse. Nett kva kompetanse vil naturlegvis vera avhengig av kva innhald ein vel å leggja inn i Fosse-senteret, skriv han.
Kristiansen påpeikar at hjå HVM har alle attraksjonane ein tydeleg identitet. Avdelingane har god lokal forankring, samstundes som dei samhandlar med ulike fagmiljø nasjonalt og internasjonalt. Organisasjonen sit òg på mykje kompetanse på forvalting av materiell kulturarv og kulturmiljø, og marknadsføring er godt etablert både lokalt, regionalt og internasjonalt.
HVM har dessutan fersk erfaring med å prosjektera, finansiera og byggja opp eit nasjonalt og regionalt kulturbygg, skriv Kristiansen i innspelet.
