Torsdag 7. november inviterer Folkeakademiet, Kvam Mållag og Fosse-Stiftinga til ei spesiell framsyning i Fossehuset i Strandebarm, «Å gjera draum til liv». Meisterspelemann Knut Hamre og skodespelar Nils Erik Kvamme heidrar Ulvik-lyrikaren Olav H. Hauge med ei framsyning bygd på dagbøkene til sistnemnde, melder arrangørane i ei pressemelding.
Hauge, som streva med psykisk sjukdom, skreiv opne og kritiske refleksjonar om psykiatrien. I framsyninga vert publikum tekne med gjennom livet til Hauge – både oppturar og kriser – gjennom dikt og musikk. Regissør Kvamme står for teaterinnslaga, medan Hamre, som var ein nær ven av Hauge, set den musikalske tonen for kvelden.
