Nye verk på plass

Kunstnaren bak utstillinga i Øystese, «Heimsyn», er Brynhild Grødeland Winther. Winther ser Hardanger frå utsida, som ei slags hovudpulsåre i vår kulturelle identitet, ein stad som er personleg og nær på ein underleg måte, skriv kunsthuset i ein presentasjon på heimesida.

I utstillinga vert mellom anna ei teikna frise på papir vist fram. Ei frise er ei tettpakka og visuell reise. Kunstnaren tek publikum gjennom natur og landskap, og personlege og felles minne og mytar. Verket er dessutan lasta med visuelle referansar frå populærkultur, kunst og historie. Frisa er 35 meter lang og tre meter høg.

Utstillinga står til 29. desember, og fram til 24. november har kunsthuset også utstillinga «Glitterskau» av kunstnaren Eivind Lentz å by på i foajeen. Utstillinga består av bilete forma av fysiske objekt, fotograferte med ein fototeknikk kalla skannografi. Lentz er i verka inspirert av folkeeventyra og Askeladden sin kreativitet, fantasi, klokskap, list og fryktløyse, opplyser kunsthuset.