Nybygga er nesten i rute
Trass ein kald og snørik vinter går arbeidet med dei to nye bygga til Hardanger fartøyvernsenter så godt som etter planen.
– Litt forseinkingar har det vorte på grunn av vintervêret, men framdrifta har likevel vore god, fortel museumsdirektør Åsmund Kristiansen.
Bygga vert av direktøren omtala som Kulturnaustet og Handverkartunet. Det første, som har ei grunnflate på om lag tusen rutemeter, er først og fremst for publikum, og skal innehalda mellom anna kafé, museumsbutikk, arkiv, bibliotek og kontor. Det andre, som har ei grunnflate på like over 500 rutemeter, er først og fremst for handverkarane, og skal fungera som verkstad og som lager for båtar og for anna maritimt utstyr.
– Manglar pengar
Arbeidet med Kulturnaustet byrja i september, medan Handverkartunet byrja reisa seg i februar. Kulturnaustet får for tida vegger og tak. Målet er å feira tett bygg i slutten av juni. Også Handverkartunet får truleg tett tak i sommar. Båe bygga skal takast i bruk i august 2025.
Om båe vert heilt ferdige til opninga, er usikkert. Prisen på dei to bygga er om lag 100 millionar kroner, men sjølv om arbeidet er i gang, manglar fartøyvernsenteret framleis om lag 21 millionar.
– Per i dag er ikkje prosjektet fullfinansiert. Me jobbar hardt for å få tak i resten av pengane, men ser ikkje bort frå at me endar med å ta opp eit lån, seier Kristiansen.
Sjølv om ikkje pengane er på plass innan august 2025, er Kristiansen trygg på at bygga kjem til å opna som planlagt.
– Me skal gjera nokre prioriteringar slik at bygga vert klare nok til at me kan ta dei i bruk. Får me alle pengane, gjer me alt ferdig. Får me ikkje pengane, må me fullføra uteområdet og ein del detaljar innandørs etter opninga, seier han.
– Vert meir synleg
Kristiansen trur dei to bygga vert viktige.
– Kulturnaustet gjer at me kan ta imot publikum på ein betre måte. Inngangen vert større og tydelegare, og eg trur gjestene vil kjenna seg meir velkomne. Slik det er i dag, lurer mange på om dei kan koma inn på fartøyvernsenteret. Kulturnaustet vil gjera oss til ein tydelegare attraksjon, seier han.
Handverkartunet vil styrkja det faglege miljøet.
– Bygget gjev handverksopplæringa vår betre vilkår. Fartøyvernsenteret samlar mange små handverk i eit fagleg fellesskap, samstundes som me driv med vidareutdanning og tek i mot lærlingar. Då treng me gode fasilitetar. Eg trur nybygga vil gje oss eit betre arbeidsmiljø. Kvardagen vert lettare for dei tilsette, seier Kristiansen.
Arbeidet fører med seg nokre ulemper for dei som vitjar senteret i 2024. Gjestene må gå tett på anleggsområda for å koma til inngangen, og dei må parkera ved fylkesvegen og gå ned til senteret.
Nybygga er ein del av prosjektet «Tett på», ein generalplan for utvikling av Hardanger fartøyvernsenter.
