Ny sesong med nytt verk

Kunstnaren bak verket – som er det niande i parken – er Arne Ingvaldsen frå Os. Han har budd og arbeidd i Kunstnarhuset Messen i april. Ordførar Torgeir Næss (Ap) stod for den offisielle opninga laurdag.

Noko meir

Kunsten gjev oss noko anna i ei verd der det meste skal målast, vegast og verdsetjast, slo ordføraren fast, og understreka korleis kunsten tilfører livet eit lag av meining og innsikt som går utover det materielle.

– Dette er spennet me lever i – mellom det konkrete og det andre – illustrert på nokre hundre meter i Ålvik, sa han.

Ordføraren sikta til det svært konkrete ved industrien like ved, og kunsten – «det andre» – i kunstparken.

Ingvaldsen har budd i kunstnarhuset i april saman med tre andre gjestekunstnarar: Iris Lam frå Nederland, Mayumi Okabayashi frå Japan og Tyskland, og Juna Wesley frå USA og Portugal.

Noko av det han beit seg merke i då han skulle byrja arbeidet, var det vesle, grøne «rommet» som parken utgjer, og det umåtelege fjordrommet utanfor, sa han under opninga. Kunstnaren ynskte å knyta romma saman.

– Klarar me det, er me i kontakt med det felles rommet, som me alle er ein del av, sa han.

Jakta på samklangen

Men kva er verdien av dette kunstverket? spurde kunstnaren seg sjølv. Det betalar seg jo ikkje. Det korte svaret er at det er veldig tilfredsstillande, meiner han.

Det tilfredsstillande er at det ein lagar, har samklang med det som er omkring, og det rommet alle er ein del av. Det knyter menneske tettare til eksistensen på jorda, og det er noko som betalar seg. Figuren i seg sjølv har avgrensa interesse, meiner kunstnaren.

Innomhus fekk publikum sjå kva dei andre kunstnarane i huset jobbar med, og kva Ingvaldsen tidlegare har laga av skulpturprosjekt og utsmykkingar.

Det er ikkje fyrste gongen osingen stiller ut i Kvam. Kunstnaren hadde ei fargerik utstilling i Kunsthuset Kabuso i 2011, der han tok i bruk sjølve vindauga i verka.