Nominert til endå ein pris
I mai vann «Superheltskolen» Gullruten for beste barne- og ungdomsprogram. No er serien nominert til Rose d'Or Awards i kategorien for born og ungdom.
Are Valle Skjelvan frå Norheimsund er «showrunner» for serien. Han er kreativ ansvarleg frå manus til ferdig produkt, i tillegg til å fylgja opp andre episoderegissørar, forklarer Skjelvan. Han arbeider som produsent og regissør for Seefood TV AS, som har produsert serien. «Superheltskolen» er ein av seks nominerte til prisen.
Ifylgje nettstaden er dei nominerte røysta fram av ein jury med over 100 kringkastingsleiarar, distributørar og produsentar frå den internasjonale filmbransjen. Det har kome inn over 700 bidrag frå over 30 land til dei 13 prisane, opplyser nettstaden.
Serieskaparen seier prisen er anerkjent i bransjen.
– Det er stas og kjekt å verta nominert, seier han.
Ifylgje Skjelvan er «Superheltskolen» er ein slags science fiction-komedie for born.
– Eg hadde lyst å laga noko som minte om dei store og eventyrlege opplevingane eg hadde då eg såg tv som liten. Det er morosamt, spennande og dramatisk på same tid, seier Skjelvan.
Han er serieskapar og har vore med på å utvikla serien frå starten. Heile livet har han vore oppteken av teikneseriar og superheltar. Etter å ha laga mykje innhald for vaksne, var det fritt og kreativt å laga denne serien for born, seier han.
– Det er alltid kjekt å laga ein sesong to, for då kan ein retta opp i alle feila ein gjorde fyrste gongen. Difor trur eg denne serien har sanka fleire prisar, seier Skjelvan.
Den fyrste sesongen av serien var nominert til Gullruten utan å nå opp, men den andre sesongen har allereie fått to prisar. I tillegg til Gullruten vann serien barne- og ungdoms-tv-kategorien i Prix Jeunesse International.
– Det hadde vore artig å vinna tre prisar på eitt år, seier Skjelvan.
Prisutdelinga finn stad i London den 2. desember. I fjor vann dramaserien «Kuppel 16» prisen.
Skjelvan har fleire prosjekt på gang. Han held på med studioregi under innspelinga av julekalenderen til Asbjørn Brekke, og er produsent for Anne Lindmo sin serie «Frifot». Sesong tre av «Superheltskolen» er allereie ferdig, og klar for å verta send på NRK neste år. Før den tid vert det sendt ein julespesial i desember.
Les også:
