– Nokre kallar det ei mannefritidsordning

Han var med og starta Mannskoret Laudamus for 25 år sidan. Det heile starta med ein gjeng som prata om å starta eit mannskor, og slik vart det, fortel han. Etter nokre år med kvinneleg dirigent overtok Kjosås rolla. Han er framleis med i koret som songar. Fellesskapet er den viktigaste årsaka.

– Me er ikkje solistar nokon av oss, men saman kan me skapa noko flott som folk set pris på, seier Kjosås.

Songane vert framførte anten utan musikk eller med piano til. Kor er enkelt å få til, ifylgje Kjosås.

– Stemma er med oss heile tida, så me slepp å pakka ned mange instrument for å halda konsert, seier han.

– Spenstig med to

Koret feira 25-årsjubileet med to konsertar i Øystese laurdag. Fyrst song koret i kyrkja, før songarane kryssa fylkesveg 79 og heldt fram i Kunsthuset Kabuso. Kjosås fortel at det er ein komité som har jobba med jubileet.

– Det er spenstig av dei å føreslå to konsertar same dagen. Det er ikkje så mange som tek sjansen på dobbeltkonsert, men eg trur det går bra, seier Kjosås.

Ideen var det dirigent Eirin Beate Åserud-Løvlid som kom med. Ho har arbeidd med koret dei siste seks åra, så ho har erfaringar frå 20-årsjubileet.

– Å ha to konsertar på same dag er eigentleg heilt galskap, men det er gøy òg. Det er ikkje så mange som torer å gjera det med to forskjellige program, seier dirigenten.

Dei to konsertane i Øystese freista med om lag 13 songar kvar. I kyrkja vart det framført kyrkjemusikk, mellom anna den songen koret byrja med å syngja for 25 år sidan. Fem tidlegare medlemer av koret bidrog til ein av songane. Dirigenten fortel at ein av songane er så vanskeleg å syngja at ho er uroa over om det går.

– Klangane er så tette at når dei syng songen riktig, høyrest det ut som dei syng feil. Det er eit moderne stykke som er uvant for dei. Eit av kvinnekora eg dirigerer, deltok med stykket i ein konkurranse nyleg, seier Åserud-Løvlid.

Ho fortel at det er mange i koret som ynskjer slike utfordringar for å utvikla seg. Det er veldig kjekt, seier ho. For om ho skal utvikla seg som dirigent, treng ho òg utfordringar.

Variert program

Like før konserten i kyrkja byrja, var nesten alle benkane fylte med publikum. Då vart dirigenten litt stressa.

– Om alle desse har tenkt å koma i Kabuso, har me eit problem. Då veit eg ikkje om det er plass til alle. Eg har aldri sett så mange på ein Laudamus-konsert før, seier ho.

I Kabuso var programmet meir variert, seier Åserud-Løvlid. Der vart mellom anna folkeviser og songar frå Odd Nordstoga, Johann Sebastian Bach, Edvard Grieg og Erik Bye framførte.

Koret har 20 medlemer, der dei fleste er kvemmingar. Dei yngste er i 40-åra, medan den eldste er 80. Mannen til Åserud-Løvlid syng òg i koret. Det byr ikkje på problem, ifylgje dirigenten.

– Når han syng med koret, er han ein av dei. Eg er på jobb, og han får verken fordelar eller ulemper. Han har delteke som solist i fleire kor eg dirigerer. Me trefte kvarandre i kormiljøet, så me tenkjer ikkje så mykje på det, seier ho.

– Vil ha fleire med

Sjølv om dirigenten føretrekkjer at koristane kan tekstane utanåt, får Laudamus-koristane ha med teksthefte. Ho prøver å leggja til rette for at dei aldrande karane kan vera med i koret.

– Mange av dei har byrja koma opp i åra. Då får ein kanskje nedsett syn eller høyrsel. Eg kan ikkje forlanga at dei skal kunne alle tekstane. Nokre av dei kan likevel det meste utanåt, seier Åserud-Løvlid.

Dirigenten trur mennene har det kjekt både på øvingar og konsertar. Ideelt sett skulle ho hatt 30 kormedlemer. Under pandemien var koret nede i 12 songarar. Det var det verste, seier ho. Ifylgje Åserud-Løvlid er det mangel både på dirigentar og menn som ynskjer synga i kor.

– Nokre kallar det ei mannefritidsordning. Om fleire har lyst å vera med, er dei hjarteleg velkomne, seier ho.

Her kan du sjå nokre glimt frå konserten i Øystese kyrkje:

Sjå også ein video her: