– Noko av det kulaste me har gjort

– Det var veldig kjekt å spela. Det var mykje folk, god stemning og mange andre flinke band, seier Midtun, som er vokalist i Violet Gin.• Sjå biletserie frå festivalen herBergensbandet, som mellom anna har vorte omtala som «eitt av dei mest lovande banda frå Noreg» av ein engelsk radiostasjon, var det andre som stod på scena i Folkets hus laurdag kveld. – Publikum var heilt rått! Folk song med og laga veldig god stemning. Det kunne ikkje ha vore betre. Det er tydeleg at folk her er veldig glade i rock’n’roll, seier ho.Ho meiner ein rockefestival på bygda er eit veldig godt konsept. – Det verkar som om det er den store hendinga i bygda kvart år.

Tatovert i 9,5 timar

170 vitja festivalen fredag og 200 laurdag, fortel festivalsjef Tommy Vikdal. For fredagskvelden er det ny rekord, medan talet laurdagskvelden er om lag 30 lågare enn då Kristopher Schau og The Dogs stod på scena i 2017.Også til opningskonserten på Storhaug torsdag var det rekordstort frammøte, fortel Vikdal.På dagtid laurdag var det barnemaraton og fotballturnering på idrettsbana, og tradisjonen tru var det utstilling og tatovering i kjellaren i Folkets hus. Mette Brønstad Flotve er mellom dei som nytta det ambulerande tatoveringsstudioet. Fredag låg ho 9,5 timar på bordet og fekk tre nye tatoveringar på leggen.– Eg har teke nesten alle tatoveringane mine her, fortel ho. Ho viser stolt fram arm og skulder, i tillegg til den såre leggen, som no er pryda av Pocahontas, Esmeralda, Simba og Nala frå Disney-verda.I kjellaren sit også Annlaug Maria Tolo. Ho jobbar som tatovør i Bergen, men er i Ålvik for å selja kunst. Å takka ja til å stilla opp, har gitt henne eit insentiv til å arbeida med kunsten.

– Når det berre er ein hobby, vert det gjerne med planane. No har eg måtta produsera, fortel ho.

Gav meirsmak

Festivalen har fått namn på seg for å ta godt vare på banda som spelar. Violent Gin er ikkje noko unntak.– Arrangørane er fantastiske folk. Me har ingenting å seia på noko. Det er eit veldig profesjonelt og godt tilrettelagt opplegg, og lydteknikarane er flinke. Dei tok veldig godt vare på oss. Me er rett og slett stornøgde, seier vokalist Midtun.Violent Gin har halde på som eit offisielt band i to år, og har altså ikkje spelt like lenge som dei fleste andre som stod på scena laurdag kveld. – Me er nok ikkje like rutinerte. Konsertar som dette gjer at me får lyst til å spela meir. Me har fått mykje skryt etterpå, seier Midtun.Også Eirik «Sipher» Søfteland skrytte av festivalen frå scena.– Tusen takk til eldsjelene som gjer dette mogleg. Tommy Vikdal er ein fantastisk kar, ropa han.

Skal slå på stortromma

Vikdal seier at han vert rørt av rosen.– Det er veldig kjekt. Det har nok noko å seia kven me arrangørane er. Me er seks godgutar og eldsjeler i styret som er opptekne av å hjelpa til, seier han.Arrangørane er strålande nøgde. Band, tatovørar, publikum, seljarar og samarbeidspartnarar har gitt gode tilbakemeldingar.– Det har vore liv og røre i bygda heile helga, både dag og natt. Det er noko me brenn for. Når ein ser korleis andre festivalar gjer det, skjer det mykje anna forskjellig enn berre musikk. Det er det me har sett fos oss. Ulike lag i bygda hjelper kvarandre og står på, seier han.Til neste år har festivalen 20-årsjubileum. Vikdal lovar at ein skal markera jubileet på ein måte som folk vil legga merke til.– Me jobbar no med booking og diverse anna. Me skal prøva å slå på stortromma, seier han.