Nok ein pris til Fosse
Ullensvang Mållag valde i år å gje målprisen til ein kvemming.
Det skriv Hardanger Folkeblad.
Den 28. målprisen til lokallaget i Ullensvang gjekk til nobelprisvinnar Jon Fosse, og vart delt ut i byrjinga av mars. Fosse har vore aktiv målmann sidan elevmållaget på Øystese Gymnas. Ullensvang Mållag meiner at verdien av Fosse sin nynorsk og Nobelprisen i litteratur kan merkast lokalt, og opplyser til oddabladet at det aldri før har vore lettare å verva medlemer til mållaget.
Fosse sende ein god ven av seg til å ta imot prisen. Dag Rune Mo, som sjølv er med i Kvam Mållag, stilte opp.
– Så langt det er mogleg, vil eg dela denne prisen med dykk – med Dag Rune, med styret i Ullensvang Mållag, men også med kvar einskild av dykk som er samla her i dag og som nyttar tida dykkar på å halda målrørsla levande, skreiv Fosse i takketalen.
