Fredag 30. august inviterer Fosse-Stiftinga, Kvam Mållag og Folkeakademiet i Kvam til «Nobelt møte» i Fossehuset i Strandebarm. Konserten byr på dikt av nobelprisvinnarane Sigrid Undset og Jon Fosse som er tonesette av Arnhild Vik. Konserten markerer prisen til Fosse i fjor og lèt prisvinnaren i 1928 «møta» den siste vinnaren i ein musikalsk hyllest, opplyser arrangørane i ei pressemelding.
Konserten hadde premiere på Bjerkebæk, heimen til Sigrid Undset, under Norsk Litteraturfestival i mai. Dikta som vert framførte, er henta frå Sigrid Undset si samling «Ungdom» og frå Jon Fosse sine «Songar» og «Stein til stein», pluss nokre av hans eldre verk.
Utøvarar er Eline Holbø Wendelbo på vokal, Arnhild Vik på piano, Sigurd Tingstad på musettetrekkspel og Brage Botn Seim på cello. Vik og Wendelbo har tidlegare vitja Fossehuset, opplyser arrangørane.
