– Mykje godt i vente

— Me fekk kjensla av at folk tykte det var kjekt å koma seg ut att, seier bookingansvarleg Stig Lundblad-Sandbakk.

Førre torsdag spela Seglem trio med saksofonist, bukkehornist og poet Karl Seglem i spissen. Fredag var det råskap, melankoli og lidenskap på scena med Ensemble Eon, og laurdag vart det framført miniatyr-operaer av Opera Avgarde.

Både torsdag og fredag var det bra med besøk i kunsthuset. Laurdag hadde Kabuso sterk konkurranse frå godvêr og solsteik.

Ny utstilling

Denne veka er dei tilsette i full gang med å plukke ned utstillinga som hadde siste opningsdag sundag.

I byrjinga av komande veke kjem Vestlandsutstillingen, som skal opna laurdag 8. mai. Opningsarrangementet vil gå føre seg i parken utanfor Kabuso.

Vestlandsutstillingen 2021 viser 31 verk av 16 kunstnarar. Alle er tilknytte Vestlandet på sin måte. I kunsten vil publikum møta både død og elende som kan lura seg under perfekte overflater. Og i det som ser øydelagt ut, kan det gøyma seg noko vakkert.

Mykje godt i vente

Neste konsert i kalenderen er Trio Alde, som spelar torsdag 6. mai. Dei vert beskrivne som tre fargesterke folkemusikarar og er ute med fyrste plata si Himaleite — Songar Av Fløgstad Og Fliflet. Konserten skulle etter planen ha vore i februar, men vart utsett.

— Me har fleire gode konsertar på planen, fortel Lundblad-Sandbakk.

Slik reglane er for arrangement no, har Kabuso plass til 76 personar i konsertsalen. Lundblad-Sandbakk trur at nokre konsertar kan verta utselde. Han dreg spesielt fram Nils Petter Molvær solo. Jazztrompetisten og musikkpioneren har konsert 20. mai.

— Det er skikkeleg stort å få han på besøk, seier Lundblad-Sandbakk.