Musikk og mål i same sal
Eit lokalt bidrag stakk av med sigeren då årets Littlarm gjekk av stabelen laurdag.
Til årets Littlarm hadde nemnda fått inn rekordmange tekstar. Det gjorde juryarbeidet ekstra krevjande, ifylgje Brit Aksnes og Håvard Gjerde som leia showet. Det var så vanskeleg å peika ut pallen at heile tre bidrag delte tredjeplassen.
Årets oppgåve var å tolka Johnny Cash og Dolly Parton. Og sjølv om flest hadde tolka Parton, var det musikken til Cash som gjekk att på scenen. Men vinnaren, «Jolene» gjendikta av Mette Lieungh, er ein Parton-låt.
– «Jolene» vart til «Eirin» og smelta alle i juryen, skriv Littlarm i eit presseskriv.
Vinnarbidraget vart framført av Stig Lundblad-Sandbakk og Heidi Marie Vestrheim. Tidleg på 2000-talet reiste dei to landet rundt saman og spela mellom anna originalen, «Jolene». Versjonen som vart framført laurdag, var nedtona og fekk fram tårene hjå publikum.
Personleg tekst
Sjølv om det var fyrste gong Littlarm enda med ein lokal vinnar, var det ikkje fyrste gong Lieungh var på pallen. Også for ti år sidan, i 2013, vart gjendiktinga hennar av Joni Mitchell framført. For å senda inn ein song, må ein ha eit forhold til artisten, påpeika ho frå scenen.
– Då oppgåva var David Bowie, sende eg ikkje inn noko, sa Lieungh.
Denne gongen fekk ho skrive om sin eigen livssituasjon. Juryen var samde om at Lieungh sitt bidrag var det aller beste av dei 76 som kom inn.
– Eg tenkte det var eit godt bidrag då eg sende det inn, sa ho etter seansen var over.
– Og så var det jo Dolly Parton.
Fullsett
Det var fyrste gong Littlarm vart avvikla i Ungdomshallen. Sist gong, i 2019, vart kjellaren på Thon Hotel Sandven nytta. Men trass mange sete var det ikkje nok til alle som møtte opp for å høyra engelske strofer omsette til nynorsk.
Lundblad-Sandbakk, Vestrheim, Aksnes og Nan Espeseth utgjorde husbandet og formidla musikken til folket. I tillegg vart bidraget «Odda» framført av Microbandet. Duoen består av Aksnes og Kjersti Døssland.
Mellom songane vart det delt artige historier og innblikk frå juryen. Ein fekk óg glimt av dei omsetjarane som var til stades i salen.
