Musikantar bles til på ny musikkfestival

Musikantar frå seks ulike lag serverte musikalske innslag i fleirbrukshallen i Jondal laurdag ettermiddag. Musikkfestivalen var den fyrste der musikklaga i Ullensvang kommune fekk høve til å spela for kvarandre.

Sjå bilete frå fyrste del av konserten:

– Litt nervøs

Herand Musikklag, som var arrangør saman med Hardanger Big Band, opna storkonserten.

– Dette var veldig moro! seier Solveig-Marie Huus.

Ho spelar trompet i Herand Musikklag. Både Huus og kjærasten Olai Åsmundson Mostad, som spelar i same lag, var nøgde då dei var ferdige med sine innslag. Dei fortalde at dei kjende seg godt førebudde, og at framføringa gjekk som vona.

Sjølv om nokre av verka dei spela, var innøvde frå før, var det fyrst over nyttår at dei gjekk i gang med dei siste førebuingane før felleskonserten. Medan dei to unge musikantane er vane med å spela for eit publikum, var framføringa laurdag noko spesiell.

Mostad, som til vanleg ikkje plar å vera nervøs før han spelar, innrømmer at han kjende litt nervar før laget byrja å spela.

– Det er jo noko ekstra når ein veit at fleire av dei som sit i publikum, er erfarne musikantar, seier han.

Også Huus fortel om ei spesiell stemning i laget.

– Alle var ekstra gira, og det var meir spaning enn elles. Eg trur alle hadde eit ynske om å få det skikkeleg til og syna kva me kan, seier ho.

Von om meir

Huus og Mostad, som båe er i 20-åra, er to av dei yngste musikantane i musikklaget i Herand. Medan Mostad har vore aktiv i laget i kring sju år, har Huus spela i over 15 år. Båe er også medlemar i Hardanger Big Band, og trivst godt i det musikalske miljøet.

– Me spelar mange kjekke låtar med kjekke folk. Me har det veldig moro saman. Musikklaga vert mest som ein ekstra familie, fortel Huus.

Storkonserten laurdag gav meirsmak for dei to musikantane. Huus vonar at arrangementet vil opna for fleire samarbeid med dei andre musikklaga i kommunen. Mostad er samd.

– Det er kjekt å høyra på dei andre. Då får me eit innblikk i kva dei andre laga held på med og kva for songar som er der ute, seier han.

– Strålande!

Kring 230 av tilhøyrarane var betalande gjester. Dei mest ivrige i salen, som var til stades i alle dei fire timane musikkfestivalen vara, fekk med seg framføringane til både Herand Musikklag, Ullensvang Skulemusikklag, Odda Storband, Nå Musikklag og Odda Musikklag. Hardanger Big Band fekk æra av å runda av storkonserten.

Ingeborg Huus, leiar i Herand Musikklag, fortel at arrangementet gjekk som vona. Ifylgje henne var det kombinasjonen av dyktige musikarar, god dugnadsånd og støtte frå sponsorar og kommunen som førte til at musikkfestivalen i Ullensvang gjekk så bra som han gjorde.

– Det var ein strålande ettermiddag! Me er så glade for at det gjekk så fint, seier ho.

Leiaren fortel at arbeidsgruppa vil evaluera tilskipinga.

– No har me sett at hallen eignar seg godt til eit slikt arrangement, og musikantane frå båe sider av fjorden verka å ha det kjekt saman. Musikk skapar trivnad, samhald og glede, så me vonar å få til dette fleire gonger, seier Huus.