Direktør i Hardanger og Voss museum, Åsmund Kristiansen (t.h.), i samtale med smed Seppe Lehembre ved Hardanger fartøyvernsenter i Norheimsund. Denne gongen er det andre avdelingar ved museet som søkjer om pengar.

Museum ber om 5,6 millionar kroner

Hardanger og Voss museum har søkt Ullensvang kommune om 580.000 kroner og Kvam herad om 280.000 kroner årleg i 2023–2025.

Håkon Norheim
Journalist
Publisert Sist oppdatert

Museet har òg søkt kommunane Eidfjord, Ulvik og Voss om pengar.

Pengane skal brukast til mellom anna å sikra kunnskapen om og tradisjonen med skautfelling, og etablera han som ei teneste ved Hardanger folkemuseum på Utne. Ein reknar ikkje med full inntening, særleg ikkje i starten. Museet treng ein prosjektstønad på 100.000 kroner i året i tre år.

Hardanger og Voss museum ynskjer å lyfta fram Agatunet som eit viktig kulturmiljø for mellom anna mellomalder- og rettshistorie. Det kjem fleire viktige markeringar i åra som kjem, skriv museet. Det treng 300.000 kroner i året i tre år til satsinga.

Hardanger folkemuseum treng dessutan 3,9 millionar kroner over tre år til å etablera eit nytt varme- og ventilasjonsanlegg på Utne.

Museet har fått 200.000 kroner frå Sparebankstiftinga Hardanger til å prosjektera det nye anlegget. Kostnaden er førebels ukjend, og ein tek difor høgd for å koma attende med ytterlegare søknader.

I alt treng museet 2,2 millionar kroner i 2023 og 1,7 millionar kroner i båe åra 2024 og 2025.

kultur og underhaldning hardanger og voss museum hardanger bibliotek og museum kultur
Laga med Labrador CMS