Motorsvikt og meisterspel
Ikkje alt gjekk etter planen då Ingrid Standal Sørheim frå Vikøy skulle tevla i Landskappleiken førre veke. Det heile enda likevel godt.
Folkemusikaren sette seg spent og glad i bilen onsdag 26. juni. Landskappleiken, som ho har delteke på kvart år sidan ho var ungdom, stod for tur. Dette året gjekk arrangementet føre seg på Gol, men det vart ein kronglete veg dit. På Ustaoset, berre halvannan time frå målet, vart det nemleg problem med bilen. Bilen fekk motorstopp.
– Eg kom meg omsider til Gol, men måtte levera bilen til hogging fredagen, fortel ho.
Høgt nivå
Historia vart òg fortalt laurdag kveld, då ho hadde kvalifisert seg til å spela finale i durspel for seniorar. Responsen frå publikum var det ingenting å seia på. Åtte tilbaud skyss heim, og fire hadde bil å selja henne. Men det var ikkje berre publikum som vart sjarmerte av historia, og truleg mest av alt av spelet. Finalen enda nemleg med ein 2.-plass. Det var veldig stort, og utruleg kjekt, seier Sørheim.
– Å få spela to slåttar solo for ein fullsett idrettshall var ei heilt «rå» oppleving, seier ho.
Nivået var høgt, og det kjendest som ein stor siger berre å koma til finalen.
Det vart ein andreplass også i fjor, men då var det berre 7 påmelde, mot 17 i år. Ifylgje Sørheim hadde tevlinga rekordpåmelding dette året. Ei av dei som heiv seg med i år, er Arngunn Timenes Bell. Ni år har gått sidan sist ho var med. Deltakinga gav både meirsmak og merksemd.
Stiller sterkt neste år
Hennar klasse – «Hardingfele B» – kan samanliknast med fotballens 1. divisjon. Om ein får nok poeng i denne klassen ved to høve, rykkjer ein opp til «eliteserien», som er «Hardingfele A». Og det var det som hende.
– Korleis kjendest det å rykkja opp?
– I den store samanhengen betyr ikkje ei slik plassering så mykje, men eg merkar at det betyr ein heil del likevel, seier Bell.
Det er kjekt å få slik vellæte frå miljøet, synest ho. Mannen hennar, Vidar Berge, deltok i open klasse, og spela gitar.
Neste års Landskappleik vert arrangert i Eidfjord. Bell lovar eit større oppmøte frå Kvam då, og ser føre seg å ha med både dansarar og yngre felespelarar.
– Det er veldig inspirerande for meg, og så håpar eg at dei kjekke elevane mine kan få kjenna på det same, seier ho.
