– Moro å laga til fest
Det vert Bakgårdsfest mellom Holmatun og Øystesehallen 8. august.
Dagleg leiar i Holmatun AS, Arne-Kristian Glück-Teigland, og 25 frivillige medhjelparar frå Øystese Fotball står bak.
Microbandet — Brit Aksnes og Kjersti Døssland — og det lokale bandet Kickstarters spelar og syng heile kvelden.
– Det er litt spesielt i år, for no kjem me tilbake etter ein pause, seier Glück-Teigland.
Alt skjer ute
Han kan ta imot maksimalt 200 gjester etter nasjonale føringar. Tilskiparane må gjera ei rekkje tiltak etter bransjestandarden som gjeld i dag. Det skal vera servering ved borda og moglegheit for ein meter avstand utanom dei som er i same husstand.
– I fjor var det 400 gjester. Då trekte me inn etter kvart, og hadde noko musikk inne, men me fann ut at alle sat ute likevel. I år vert difor alt laga til ute, seier den daglege leiaren.
Kafé Krus står for grillmaten.
Pilotprosjekt
Det er andre gongen Bakgårdsfest vert skipa til. Det er det fyrste arrangementet av ein slik storleik i Øystese etter at koronapandemien er på vikande front.
– Me veit at alle ser på oss, så me prøver å gjera det beste ut av det. Kanskje me kan etablera ein lokal bransjestandard. Så kan andre læra av det me gjer eventuelt rett eller feil, seier Glück-Teigland.
Dei frivillige får oppgåver som rigging ein heil dag. Hjelparane skal få på plass stolar, telt, lys og ikkje minst scene og det som høyrer med. På arrangementsdagen tek dei seg av servering og rydding.
– Det er moro å laga til noko slikt, for det er tydeleg at folk er svoltne på arrangement. Ein har vore avskoren frå høve til å samlast. Når det opnast opp i den grad det har gjort no, så er det positivt. Fyrst tenkte eg at eg ikkje skulle vera den fyrste ut. Men så snudde eg på det: Sjølvsagt skal eg gjera det! Det er heilt topp, det, seier primus festmotor Glück-Teigland.
