Middagar på kryss og tvers i Kvam
Frå den eine utkanten av Kvam til den andre møtest seniorar til prat og ein betre middag i regi av Grannehjelpa.
— Det er fint å tenkja på Kvam som ein heilskap, og at det er fint at dei som bur i heradet, får ta turen til andre bygder enn henne dei bur i.
Det seier frivilligkoordinator i Grannehjelpa, Rut Oppedal Rasmussen. Saman med Kvam herad arrangerer frivilligsentralen i Norheimsund middagar for seniorane i heradet.
— Frammøtet er svært godt. Mange har knapt vore ute av huset sidan før pandemien. Fleire av gjestene melder seg på gong etter gong, seier Rasmussen.
Få treffast
Torsdag samlast over 100 gjester på Gamlastovo Gardsrestaurant på Fykse. Det var så mange frammøtte at gjestene fylte både «Skykkjeskukkjen» og tømmerstova.
Ved eitt av borda i «Skykkjeskukkjen» sat ein gjeng frå Ålvik saman med eit par frå Øystese. Dei som lokalavisa kom i prat med, er svært nøgde med tilbodet frå Grannehjelpa. Fleire av dei har vore med på dei fleste eller alle middagane som frivilligsentralen har stelt i stand i haust.
Liv Irene Øye og Ragnhild Margrete Sjo tykkjer at det beste med middagane er å få samlast og å treffa kjende som dei ikkje møter så ofte elles i kvardagen.
— Det er godt å ha noko å sjå fram til, og ein grunn til å koma seg ut av huset. Då vert ein ikkje sitjande inne åleine, seier Øye.
Øye og Sjo har vore til stades på middagane både i Strandebarm, Berge og Ålvik. Dei to damene tykkjer det er flott at tilstellingane er lagde til ulike område i heradet.
Rasmussen fortel at frammøtet har vore overraskande godt frå starten, og at det gradvis har auka. Frivilligsentralen byrja fyrst forsiktig med å arrangera middagar på hotella i Norheimsund og Øystese. Då dei seinare inviterte til middag i Hallvardsnaustet i Strandebarm, møtte heile 80 svoltne personar opp. Lokalet hadde plass til kring halvparten, så arrangørane vart nøydde til å dela middagen opp i to. Det store frammøtet førte til at dei måtte sjå etter lokale som kunne husa mange, fortel frivilligkoordinatoren.
Nytta lokale tilbod
Grannehjelpa har også stelt i stand middagar på Berge Gard & Gartneri og i Folkets Hus i Ålvik. Ifylgje Rasmussen har 70—90 personar delteke.
Gjestene betalar ein liten eigendel. Pengane frå Helsedirektoratet dekkjer resten. I tillegg til maten har det vore gratis lotteri og kulturelle innslag på programmet.
Rasmussen vonar at dei næringsdrivande nyttar godt av arrangementa, og at dei sit att med ei positiv oppleving.
— Det er viktig at me speler på lag med dei næringsdrivande, og at me heiar på kvarandre. Me ynskjer å vera flinke til å nytta tilboda i bygdene i Kvam, seier ho.
Grannehjelpa har også stelt i stand eit par middagar for dei som bur i omsorgsbustader, opplyser Rasmussen. Då har bebuarane, saman med pårørande eller tilsette, teke turen saman til hotellet i Øystese.
Både Kvam herad og frivilligsentralen har fått stønad frå Helsedirektoratet. Heradet har overlate ansvaret til Grannehjelpa, som administrerer og organiserer middagane.
