Meir pengar til koronaråka Kabuso

Kunsthuset får 400.000 kroner meir å rutta med i år.

Fagleg og dagleg leiar i kunsthuset, Sissel Lillebostad, fortel at Kabuso har fått pengar frå to pottar. Kunsthuset har fått 100.000 kroner i såkalla arrangørstønad. Pengane skal brukast til konsertar og arrangement i kunsthuset. Dessutan har kunsthuset fått 300.000 kroner i arenastønad. Pengane skal brukast til å utvikla konsertsalen.

Forsterka musikk

– I første omgang skal me få gjennomført ein akustisk analyse av kammermusikksalen. Me har ein sal som fungerer fantastisk for akustisk musikk og særleg for kammermusikk. Målet er å utvikla salen slik at den skal fungera betre også for forsterka musikk, seier Lillebostad.

Ho fortel at den akustiske analysen skal gjennomførast så snart som mogleg.

– Me skal henta inn ein mann frå hovudstaden til å gjera dette, og det kjem me til å gjera så snart koronatiltaka vert reduserte nok til at det lèt seg gjera.

Pengane skal òg brukast til å gjera salen betre eigna til filmvisning. Lerretet skal verta breiare, og det skal investerast i betre projektor og høgtalarar.

– Me har eit håp om å kunna starta arbeidet før sommaren. Ei av utstillingane me ventar på, inneheld eit par veldig flotte filmar, seier Lillebostad.

Manglar eigendel

Kabuso er stengt på grunn av koronaviruset. Mange tilskotsordningar stiller eigendelskrav til søkjarane. Det gjeld også Kulturrådet. Lillebostad seier ho er litt uroleg for at kunsthuset ikkje skal klara å stetta eigendelskrava.

– Når me ikkje får halda ope, har me ikkje inntekter. Eg er ikkje heilt sikker på kvar me skal henta pengane til å tilfredsstilla eigenandelskrava. Virusutbrotet gjer det vanskeleg å planleggja. Ting endrar seg heile tida. Mange av arrangementa me har planlagt, er avlyste, og truleg vil turistsesongen verta sterkt redusert. Det påverkar besøkstala og vil føra til ein kraftig reduksjon i inntektene i år, seier ho.

Håpar på pakke

Lillebostad trur og håpar at også musea vil få ein tilskotspakke frå styresmaktene.

– Me håpar at me skal få reine tilskot til drifta. Eg har tru på at regjeringa skjønar alvoret, seier Lillebostad.

Ingen av dei tilsette i Kabuso er permitterte, men Lillebostad fortel at det er sendt permitteringsvarsel som gjeld frå 14. april.

Også konsertarrangøren Felemakarscenen i Strandebarm har fått pengar frå Kulturrådet. Rådet har sett av 60.000 kroner til arrangøren.